Ályktun almenns íbúafundar um framtíð Grindavíkur
Eftirfarandi ályktun var samþykkt á íbúafundi í Grindavík 22. apríl 2026.
Almennur íbúafundur í Grindavík þakkar landsmönnum og stjórnvöldum mikilvægan stuðning á erfiðum tímum. Stuðningur og umhyggja mega þó ekki snúast upp í forræðishyggju. Grindvíkingum er treystandi til að taka ákvarðanir um eigið líf og við krefjumst þess að stjórnvöld standi ekki í vegi fyrir eðlilegri endurreisn bæjarins.
Fundurinn gerir tvær afdráttarlausar kröfur til stjórnvalda:
1. Skólastarf verði tryggt í haust
Að neita barnafjölskyldum sem vilja snúa heim um grunnþjónustu jafngildir því að stöðva endurreisn bæjarins. Rök um að skólastarf sé of hættulegt standast ekki. Börn dvelja nú þegar í bænum og öryggi þeirra er betur tryggt í skipulögðu skólastarfi en í frítíma.
Stærsta áfall barnanna í Grindavík er að hafa misst tengslanet og vini. Að dæma þau til óvissu í heilt ár í viðbót er óásættanlegt.
2. Jafnræði verði tryggt í húsnæðismálum
Fundurinn treystir því að Fasteignafélagið Þórkatla muni ekki gera upp á milli íbúa eftir fjölskyldugerð. Öllum fyrrverandi eigendum húsnæðis í Grindavík verður að gera það kleift að flytja aftur í sín hús, kjósi þeir það og það ferli má ekki draga á langinn.
Við skorum á ríkisstjórn og þingmenn Suðurkjördæmis að hlusta á íbúana og vinna með okkur, en ekki gegn okkur. Þá fyrst getur endurreisn samfélagsins í Grindavík hafist fyrir alvöru.
