Pistill bæjarstjórnar 8. maí 2026: Samstaða, uppbygging og bjartari tímar fram undan
Sumarið er fram undan og víða má sjá ummerki þess Grindavík. Hér fyrir neðan förum við yfir nokkur af þeim verkefnum, framkvæmdum og viðburðum sem setja svip sinn á bæinn þessa dagana.
Við viljum byrja á því að þakka ykkur kærlega fyrir komuna og þátttökuna á kraftmiklum íbúafundi á dögunum. Þar skein samstaða og skýr vilji Grindvíkinga í gegn og sýndi hversu sterkt samfélag við eigum.
Í kjölfarið átti bæjarstjórn síðan fund með forsætisráðherra og hennar fólki til að fylgja eftir okkar málum. Bæði á íbúafundinum og á fundinum með ráðherra var farið yfir þau stóru mál sem brenna á okkur öllum; sálrænan stuðning, áhættumat, húsnæðismálin hjá Fasteignafélaginu Þórkötlu og framtíð skólamála í bænum. Þetta samtal mun halda áfram með nýrri bæjarstjórn sem verður kjörin á næstunni.
Framkvæmdir sumarsins og minjavarsla: Græðum sárin
Sumarið framundan verður nýtt til að græða sárin innanbæjar. Meðal annars stendur til að hefjast handa við framkvæmdir á skólalóðinni við Ásabraut, endurnýja leiktæki og fegra þau svæði þar sem niðurrif hefur átt sér stað. d
Niðurrifsverkefnin ganga mjög vel en eru eðli málsins samkvæmt tímafrek. Stefnt er að því að búið verði að fjarlægja öll hús á sprungusvæðum fyrir lok sumars. Fljótlega hefst niðurrif við Víkurbraut en þar verður sérstaklega hugað að minjavörslu. Við leggjum mikla áherslu á að varðveita ákveðna hluti og einkenni húsa á svæðinu. Þannig viljum við halda til haga áþreifanlegum vitnisburði um húsin og það samfélag sem þar blómstraði og skapa jafnframt minningu um þær hamfarir sem gengið hafa yfir.
Staðan á sprunguviðgerðum
Markvissar sprunguviðgerðir eru í fullum gangi og munu standa yfir fram í næsta vetur. Þessa dagana er til að mynda verið að vinna að viðgerðum við íþróttahúsið. Fljótlega munu viðgerðir svo hefjast á nýjum svæðum, þar á meðal við Austurveg og Mánagötu, á svæðinu við Staðarsund og Vörðusund, sem og á æfingavellinum og upp að Suðurhópi (alla leið frá Salthúsinu).
Áfram Grindavík!
Meistaraflokkur karla í körfubolta er kominn í úrslitaviðureign Íslandsmótsins í körfuknattleik. Við óskum þeim til hamingju með það og hvetjum þá til áframhaldandi stórra sigra. Meistaraflokkur kvenna náði frábærum árangri í vetur, þótt titilvon sé úti í bili. Áfram Grindavík!
Takk fyrir kjörtímabilið
Sveitarstjórnarkosningar eru framundan og kjörtímabilið er að renna sitt skeið. Við í bæjarstjórn viljum því nýta þetta tækifæri og þakka ykkur öllum kærlega fyrir samstarfið á kjörtímabilinu og þá ótrúlegu samstöðu sem Grindvíkingar hafa sýnt á þessum fordæmalausu tímum.
Með kveðju og ósk um bjart sumar,
Bæjarstjórn Grindavíkur
