Bókasafn Grindavíkur opnar á ný
Bókasafn Grindavíkur opnar á ný mánudaginn 28. september kl. 17.00. Safnið hefur verið lokað frá rýmingu Grindavíkur í nóvember 2023 og því er um kærkomin tímamót að ræða.
Bókasafnið á sér langa og merka sögu í Grindavík en upphaf þess má rekja til ársins 1904 þegar Lestrarfélag Grindavíkur var stofnað. Í gegnum tíðina hefur safnið verið til húsa víða um bæinn, meðal annars í turni gömlu kirkjunnar, skólum bæjarins, Kvenfélagshúsinu, Læknishúsinu og Festi.
Safnið hefur frá upphafi gegnt mikilvægu hlutverki í menningar- og samfélagslífi Grindavíkur. Í frétt í Bæjarbót frá árinu 1983 kemur meðal annars fram að safnið hafi lánað bókakassa um borð í skip svo sjómenn gætu notið góðra bóka á sjónum. Þá voru útlán safnsins um 18.000 bækur árið 1982, sem sýnir vel hversu stóran sess bókasafnið skipaði í daglegu lífi Grindvíkinga.
Nýtt skipulag og breytt bókasafn
Nú hefst nýr kafli í þessari löngu sögu. Núverandi húsnæði bókasafnsins var tekið í notkun árið 2014 og er það í góðu standi þrátt fyrir að safnið hafi verið lokað undanfarin tæp þrjú ár. Á síðustu vikum hefur verið unnið að breytingum á innra skipulagi og uppsetningu safnsins með það að markmiði að bæta aðstöðu og nýtingu rýmisins.
Jafnframt hefur þurft að endurskipuleggja bókakost safnsins. Fjöldi bóka var í útláni þegar Grindavík var rýmd í nóvember 2023 og hefur hluti þeirra ekki skilað sér aftur á safnið. Fullur skilningur er sýndur á þeim aðstæðum sem lánsþegar hafa búið við í kjölfar rýmingarinnar. Vegna þessa hefur þurft að leggjast í vinnu við að yfirfara allan safnkost til að sjá hvaða bækur safnið hefur í raun að geyma. Þessi vinna mun halda áfram án þess að gestir bókasafnsins verði þess varir.
Mikil tilhlökkun að opna dyr bókasafnsins á ný
Það er einstakt að fá að taka þátt í því að opna bókasafnið á ný eftir svo langa lokun. Mikil vinna hefur átt sér stað á síðustu vikum og ég hlakka til að taka á móti Grindvíkingum og sjá safnið lifna við á ný
segir Anna María Cornette, forstöðumaður Bókasafns Grindavíkur.
Hátíðleg opnun 28. september
Í tilefni af opnuninni verður boðið upp á veitingar og skemmtilega dagskrá fyrir gesti.
Rithöfundarnir Matthildur Yrsa Sigurðardóttir og Þórunn Rakel Gylfadóttir verða sérstakir gestir og lesa upp úr bók sinni Síðasti dagurinn. Bókin hlaut Sólfaxa – íslensku barnabókaverðlaunin árið 2026 og verður hægt að kaupa hana á staðnum.
Grindvíkingar á öllum aldri eru hvattir til að líta við, skoða breytingarnar og fagna því saman að bókasafnið sé loksins opið á ný.
Opnunartími bókasafnsins í vetur:
Bókasafnið verður opið nemendum Grunnskóla Grindavíkur fjóra daga vikunnar í vetur. Þá verður safnið opið almenningi á fimmtudögum frá klukkan 13.00 til 17.00.
Verið hjartanlega velkomin á opnun safnsins mánudaginn 28. september kl. 17.00.
