Listaverk og minnisvarðar
Víða má finna listaverk og minnisvarða í Grindavík sem lífga upp á bæjarmyndina. Þau minna okkur á fólk, atburði og rætur samfélagsins, en endurspegla jafnframt sköpunarkraft og sjálfsmynd staðarins. Verkin eru hluti af daglegu lífi í bænum og tengja saman fortíð, nútíð og framtíð.
Orka
Listaverkið Orka eftir Lindu Oddsdóttur stendur á hringtorgi við innkomu til Grindavík. Verkið vísar til náttúruafla svæðisins og þeirrar orku sem mótað hefur bæði landslagið og samfélagið. Verkið var afhjúpað árið 2009 og hefur síðan verið eitt af kennileitum bæjarins.
Afl hafsins
Afl hafsins er eftir listakonuna Guðbjörgu Hlíf Pálsdóttur og stendur á hringtorgi við Hópsbraut. Verkið vísar til áhrifa sjávarins á líf Grindvíkinga. Það var vígt árið 2009 og setur sterkan svip á umhverfi sitt.
Dans seglanna
Dans seglanna, einnig eftir Guðbjörgu Hlíf Pálsdóttur, stendur á öðru hringtorgi við Hópsbraut. Verkið vísar til segla skipanna og samspils hreyfingar, vinds og sjávar.
Tyrkjaránið
Glerlistaverkið um Tyrkjaránið eftir Einar Lárusson var afhjúpað á sjómannadaginn árið 2001. Verkið segir frá Tyrkjaráninu, einum dramatískasta atburði í sögu Grindavíkur, og er frásögnin birt á sex tungumálum. Það minnir á örlög þeirra sem rænt var og þá sögulegu arfleifð sem atburðurinn skildi eftir sig.
Vonin – minnisvarði sjómanna
Minnisvarðinn Vonin, eftir Ragnar Kjartansson myndhöggvara, var afhjúpaður á sjómannadaginn árið 1980. Verkið sýnir eiginkonu og börn sjómanns horfa til hafs í von um heimkomu og minnir á hættur sjómennskunnar og þrautseigju þeirra sem eftir bíða.
Minnisvarði um Sigvalda Kaldalóns
Minnisvarði um lækninn og tónskáldið Sigvalda Kaldalóns var vígður árið 1996 og stendur húsið Kvennó við Víkurbraut. Sigvaldi bjó lengi í Grindavík og hafði djúp áhrif á menningarlíf bæjarins. Lög hans, meðal annars Suðurnesjamenn, Ísland ögrum skori og Á Sprengisandi, eru órjúfanlegur hluti af íslenskri tónlistararfleifð.
Minnisvarði um séra Odd V. Gíslason
Minnisvarði um séra Odd V. Gíslason, prest í Grindavík og Höfnum á árunum 1878–1894, var afhjúpaður í kirkjugarðinum á Stað árið 1990. Oddur var mikill frumkvöðull í slysavörnum og stofnaði bjargráðanefndir víða um land. Verkið er eftir Gest Þorgrímsson og er reist til minningar um samfélagslegt frumkvæði hans og hugsjónir.
Saltarinn
Listaverkið Saltarinn eftir spænska listamanninn Eskerri var reist árið 2023 til heiðurs starfsfólki útgerðarfélagsins Þorbjarnar. Verkið er tákn þrautseigju, samstöðu og verðmætasköpunar í sjávarútvegi. Á fótstalli þess er áletrun sem vísar til salts, blóðs og svita, og að lokum fjársjóðsins.