Frístunda- og menningarnefnd - 18. fundur

Á fundinn mætti Margrét R. Gísladóttir forstöðumaður bókasafnsins. Kynnti hún teikningar af nýju bókasafni og eins voru ný bókasafnslög sem samþykkt frá Alþingi í desember sl. lögð fram til kynningar. Nefndin þakkar Margréti fyrir greinargóða kynningu á nýju bókasafni. Nefndin fagnar þeirri uppbyggingu sem fara á í með nýju bókasafni og tónlistarskóla.

Á fundinn mættu þeir Hallur Gunnarsson, Einar Lárusson og Örn Sigurðsson. Í áhaldahúsi Grindavíkurbæjar hafa verið til margra ára gamlir munir sem voru farnir að liggja undir skemmdum. Hallur og Einar hafa í sínum frítíma flokkað þessa muni og sett í geymslukassa sem nú eru geymdir hjá Þorbirni hf. Fóru þeir yfir helstu gripi og vilja gjarnan fá svör við því hvað Grindavíkurbær hyggst gera með þessa muni. Nefndin þakkar þeim félögum fyrir virðingavert framtak í því að varðveita sögulega muni Grindavíkurbæjar. Nefndin leggur áherslu á að þessir munir verði varðveittir og þakkar forsvarsmönnum Þorbjarnar fyrir þeirra framlag í varðveislu þessara muna. Nefndin leggur til við bæjaryfirvöld að hafin verði vinna við gerð stefnu í menningarmálum sem m.a. tekur á varðveislu sögulegra muna.

Samkvæmt venju verða menningarverðlaun Grindavíkurbæjar afhent í menningarvikunni. Hlutverk verðlaunanna er m.a. að vera almenn hvatning til eflingar menningar- og listastarfs í sveitarfélaginu. Sviðsstjóra frístunda- og menningarsviðs falið að kalla eftir tilnefningum.

Sviðsstjóri frístunda- og menningarsviðs kynnti drög að dagskrá. Frístunda- og menningarnefnd hvetur Grindvíkinga til að taka þátt í vikunni og sérstaklega þá sem vilja bjóða upp á einhver atriði að hafa samband við sviðsstjóra frístunda- og menningarsviðs sem fyrst og eigi síðar en 15. febrúar n.k.

Tekið fyrir erindi Önnu Sigríðar Sigurjónsdóttur og Sólveigar Baldursdóttur myndhöggvara þar sem kynnt er hugmynd að steinskúlptur symposium sumarið 2014. Hugmyndin er að bjóða listamönnum til Grindavíkur þar sem þeir munu dvelja, í ca. einn mánuð, við vinnu og gerð skúptúra sem verða að lokinni þessari vinnu og sýningu í eign Grindavíkurbæjar. Telja þær að hér sé gott tækifæri fyrir Grindavíkurbæ til að eignast ómetanleg listaverk, sem gætu orðið upphafið af skúptúrgarði eða útilistaverkasafni bæjarins og haft mikið aðdráttarafl fyrir ferðafólk og jafnframt væri þetta verkefni til að efla menningarstarf í samfélaginu. Nefndin getur ekki komið að erindinu í núverandi mynd en fagnar þó hugmyndinni og hugsanlega er hægt að leggja til húsnæði.

Nefndin leggur til að gerður verði sambærilegur viðauki við samning GG líkt og gert var við UMFG.

Farið yfir aðsóknartölur að sundlaug Grindavíkur fyrir árið 2012. Töluverð aukning hefur orðið á aðsókn að sundlauginni sem rekja má til komu líkamsræktarinnar í húsakynnum sundlaugarinnar.

Frístunda- og menningarnefnd hvetur íbúa og fyrirtæki í Grindavík til áframhaldandi góðrar þátttöku í Lífshlaupi Íþrótta- og ólympíusambands Íslands.