Bæjarráð Grindavíkur - 1725. fundur

Gestir fundarins undir þessum dagskrárlið: Sviðsstjóri frístunda- og menningarsviðs, forstöðumaður íþróttamannvirkja og launafulltrúi.

Lagt fram minnisblað um mönnun og vaktaskipulag íþróttamannvirkja.

Bæjarráð þakkar fyrir þær skýringar sem veittar voru á fundinum um vaktafyrirkomulag og lágmarkskröfur um mönnun íþróttamannvirkja.

Gestir fundarins undir þessum dagskrárlið: Sviðsstjóri frístunda- og menningarsviðs og launafulltrúi.

Farið yfir stöðu mála varðandi uppbyggingu frístundastarfs fyrir börn- og ungmenni. Áfram er stefnt að því að allt félagsmiðstöðvarstarf á vegum Þrumunnar utan skólatíma verði staðsett í íþróttamannvirkjum.

Sviðsstjóri greindi einnig frá því að stefnumótunarvinna er hafin á vettvangi UMFG.

Lögð er fram bókun innviðanefndar frá 19. október sl., þar sem nefndin samþykkti að hefja vinnu við breytingu á gildandi deiliskipulagi vegna fyrirhugaðrar uppbyggingar afþreyingar- og ferðamannasvæðis norðan þéttbýlis Grindavíkur, við Efrahóp.

Áformin fela meðal annars í sér gerð göngustíga, brúar og bílastæða ásamt aðstöðu til útivistar og fræðslu. Fyrirhuguð uppbygging kann að kalla á breytingu á landnotkun hluta íbúðarsvæðanna ÍB8 og ÍB11 í Aðalskipulagi Grindavíkur 2018-2032.

Bæjarráð tekur undir tillögu innviðanefndar og leggur til við bæjarstjórn að samþykkt verði að hefja vinnu við breytingu á Aðalskipulagi Grindavíkur 2018-2032 vegna fyrirhugaðrar uppbyggingar afþreyingar- og ferðamannasvæðis norðan þéttbýlis við Efrahóp.

Lögð fram tillaga að hönnun Végarðs, dags. 25. ágúst 2026. Málið var tekið fyrir í innviðanefnd 19. október og var þar lögð fram tillaga að hönnun að afþreyingar- og ferðamannasvæðinu Végarði við Austurveg dags. 25. ágúst 2026. Tillagan sem áður hefur verið kynnt felur meðal annars í sér uppbyggingu sýningar- og fræðslusvæðis, göngu- og dvalarsvæða og aðstöðu fyrir gesti, með áherslu á sögu Grindavíkur og náttúruhamfarir.

Bókun innviðanefndar er svohljóðandi: Innviðanefnd líst vel á að sýna hluta af Stamphólsgjánni en mælir með lágstemmdari heildarumgjörð svæðisins.

Með hliðsjón af bókun innviðanefndar eru lögð fram á fundi bæjarráðs uppfærð drög að útfærslu áfangastaðarins, sem felur í sér lágstemmdari uppbyggingu. Bæjarráð felur bæjarstjóra að vinna málið áfram á þeim grundvelli.

Lögð fram tillaga að framtíðarsýn fyrir aðgengi ferðamanna að Efrahópi. Tillagan var til umfjöllunar í innviðanefnd 19. október. Á fundinum voru lögð fram uppfærð hönnunargögn vegna verkefnisins Seigla-Efrahóp, dags. 12. október 2026, þar sem meðal annars voru kynntar þrjár mögulegar staðsetningar fyrir bílastæði. Óskað var eftir afstöðu nefndarinnar til fyrirhugaðrar staðsetningar bílastæða.

Innviðanefnd samþykkti fyrirhugaða legu á göngustíg meðfram nýja hrauninu milli Efrahóps og Norðurhóps og að göngustígur endi að austanverðu við göngubrú yfir hraunið. Þá samþykkir innviðanefnd að áframhaldandi hönnun bílastæða við Efrahóp miðist við staðsetningu fyrir ofan Norðurhóp. Nefndin felur skipulags- og umhverfissviði að vinna áfram að útfærslu tillögunnar.

Bæjarráð fellst á tillögu innviðanefndar um áfangaskiptingu verkefnisins og felur skipulags- og umhverfissviði að sækja um styrk frá Framkvæmdasjóði ferðamannastaða vegna I. áfanga verkefnisins, þ.e. göngubrú yfir hraunið og stíg norðan við brúna.

Lögð fram til kynningar umsögn, dags. 11. nóvember 2026, um frumvarp til sveitarstjórnarlaga, 5. mál.

Fjárhagsáætlun Grindavíkurbæjar og stofnana fyrir árin 2027-2030 er lögð fram.

Bæjarráð vísar áætluninni til fyrri umræðu í bæjarstjórn.