Bæjarráð Grindavíkur - 1710. fundur

Lagnaþjónusta Þorsteins óskar eftir niðurfellingu fasteignagjalda af Fálkahlíð 4-6, sbr. erindi dags. 15. apríl 2026. Á síðasta fundi bæjarráðs var málinu frestað og óskað eftir frekari gögnum.

Eigandi fasteignarinnar hefur lagt fram greinargerð um hreyfingar á húsinu sem byggja á mælipunktum sem eru til staðar.

Fallist er á beiðni lóðarhafa um niðurfellingu fasteignagjalda vegna Fálkahlíðar 4-6. Er það gert á grundvelli upplýsinga um að sprunguviðgerð er ólokið í Fálkahlíð og eru því ekki forsendur til að tengja húsið við veitur. Bæjarráð áréttar að niðurfelling gildir aðeins fyrir árið 2026. Eru lóðarhafar við Fálkahlíð eindregið hvattir til þess að heimila sem fyrst viðgerð á lóðum sínum þannig að unnt verði að tryggja öruggt aðgengi að fasteignum.

Gestur fundarins undir þessum dagskrárlið: Sviðsstjóri frístunda- og menningarsviðs.

Drög að reglum um frístundastyrki lögð fram. Samfélagsnefnd hefur samþykkt reglurnar fyrir sitt leyti.

Bæjarráð samþykkir reglurnar og vísar þeim til bæjarstjórnar til samþykktar.

Gestur fundarins undir þessum dagskrárlið: Sviðsstjóri frístunda- og menningarsviðs.

Norður Travel Services hefur sent fyrirspurn um mögulegt svæði til að halda viðburð þann 12. ágúst 2026 vegna sólmyrkvans. Gert er ráð fyrir fjórum rútum með um 250 manns.

Sviðsstjóra frístunda- og menningarsviðs falið að vinna málið áfram.

Lagt fram fundarboð aðalfundar Landskerfa bókasafna þriðjudaginn 12. maí, kl. 14:00.

Bæjarráð samþykkir að Eggert Sólberg Jónsson, sviðsstjóri frístunda- og menningarsviðs, verði fulltrúi Grindavíkurbæjar á fundinum.

Gleðipinni ehf. 630126-0290 sækir um veitingaleyfi í flokki II - A Veitingahús í Sjómannastofunni Vör, Hafnargötu 9, Grindavík.

Bæjarráð samþykkir veitingu leyfisins.

Akstursíþróttafélag Suðurnesja óskar eftir heimild Grindavíkurbæjar til þess að fram fari rall um Hópsnesið 6. júní.

Bæjarráð gerir ekki athugasemd við að keppnin fari fram fyrir sitt leyti en bendir á að leita þurfi heimildar annarra landeigenda.