Bæjarráð Grindavíkur - 1340. fundur

Dómur Héraðsdóms Reykjaness í máli E-743/2013 Gísli Þorláksson gegn Grindavíkurbæ lagður fram.

Grindavíkurbær er dæmdur til að greiða stefnanda 1.100.000 krónur með dráttarvöxtum, sem er það sem Grindavíkurbær bauð sem sáttaboð í málinu vorið 2013, en var hafnað af stefnanda.

Fulltrúi D-lista leggur fram eftirfarandi bókun.

Þetta er þriðja dómsmálið á stuttum tíma þar sem bænum er gert að borga bætur, til starfsfólks bæjarins.

Fulltrúi D- lista.

Fulltrúar B-, G- og S-lista leggja fram eftirfarandi bókun.

Öll þrjú dómsmálin eru mjög ólík og tilviljun að niðurstaða þeirra kemur á sama tíma. Dómsmál varðandi eineltismál var ólíkt öðrum er höfðu fallið hér á landi og þótti því mikilvægt að fá niðurstöðu um hver sé ábyrgð vinnuveitanda í slíkum málum. Málið sem fór fyrir félagsdóm snérist um mismunandi túlkun Starfsgreinasambandsins og ríkis og sveitarfélaga. Þar var framkvæmd sem hafði tíðkast hjá sveitarfélögum og ráðuneytum gagnrýnd og þótti öllum aðilum mikilvægt að fá niðurstöðu félagsdóms áður en kjarasamningsviðræður hæfust. Í þessu máli var Grindavíkurbær dæmdur til að greiða sömu upphæð og stefnanda hafði verið boðið. Er því ekkert óeðlilegt við þessi þrjú dómsmál, en mjög óeðlilegt er að Grindavíkurbær fari í þá átt að greiða meira en því ber eingöngu til að forðast dómsmál.

Fulltrúar B-, G- og S-lista.

Í tilefni 40 ára kaupstaðarafmælis Grindavíkurbæjar samþykkir bæjarráð að bjóða starfsmönnum Grindavíkurbæjar á Þorrablót UMFG þann 1. febrúar næstkomandi.

Bæjarstjóra er falið að vinna málið áfram, m.a. að kalla eftir skráningum.

Áskoranir ASÍ og SA til sveitarfélaga varðandi gjaldskrárhækkanir lagðar fram.

Bæjarráð tekur fram að Grindavíkurbær hefur lækkað útsvar niður 13,99% sem kemur öllum launþegum vel og eykur kaupmátt. Gjaldskrárhækkunum hefur verið stillt í hóf og eru gjaldskrár almennt lágar í Grindavík. Tímagjöld í leikskóla eru til dæmis óbreytt á milli ára og niðurgreiðsla til foreldra vegna dagforeldraþjónustu var aukin um 30%.

Unnið er að breytingum á afsláttarkjörum milli dagvistunarúrræða sem munu koma barnmörgum fjölskyldum vel. Auk þess hafa verið gerðar breytingar á viðmiðum vegna afslátta af fasteignasköttum sem munu koma tekjulágum öryrkjum og eldri borgurum vel.

Bæjarráð vísar áskorunum til umræðu í bæjarstjórn.

Samkvæmt 5. gr. laga um fjármál stjórnmálasamtaka og frambjóðenda og um upplýsingaskyldu þeirra skulu sveitarfélög með fleiri en 500 íbúa veita stjórnmálasamtökum, sem fengið hafa a.m.k. einn mann kjörinn í sveitarstjórn eða hlotið a.m.k. 5% atkvæða í næstliðnum sveitarstjórnarkosningum, árleg fjárframlög til starfsemi sinnar.

Bæjarráð vísar ákvörðun um framlögin til umfjöllunar í bæjarstjórn.

Bæjarráð fór yfir tillögu að nýjum samþykktum um stjórn og fundarsköp Grindavíkurbæjar.

Frestað til næsta fundar.

Fundargerðir verkfundar nr. 23 og bygginganefndar nr. 7 lagðar fram.