Bæjarstjóri
Bæjarstjóri Grindavíkur er Fannar Jónasson. Hann er framkvæmdastjóri sveitarfélagsins og ber ábyrgð á daglegri starfsemi þess.
Fannar Jónasson
Fannar Jónasson tók við starfi bæjarstjóra í ársbyrjun 2017. Hann var endurráðinn í kjölfar sveitarstjórnarkosninganna 2018 og aftur 2022.
Fannar er stúdent frá Verzlunarskóla Íslands, viðskiptafræðingur af endurskoðunarsviði (Cand Oecon) frá Háskóla Íslands og með MBA gráðu frá sama skóla.
Fannar bjó ásamt fjölskyldu sinni á Hellu fram til 2001 og rak þar viðskiptaþjónustu fyrir einstaklinga og fyrirtæki. Jafnframt sinnti hann sveitarstjórnarmálum af ýmsum toga um 20 ára skeið og var m.a. oddviti sveitarstjórnar Rangárvallahrepps. Hann sat í ýmsum nefndum og ráðum á vegum síns sveitarfélags sem og annarra sveitarfélaga á Suðurlandi.
Árið 2001 flutti fjölskyldan á höfuðborgarsvæðið þar sem Fannar vann m.a. hjá Arion banka og forverum hans og þá lengst af sem útibússtjóri. Eiginkona hans er Hrafnhildur Kristjánsdóttir viðskiptafræðingur og eiga þau þrjú börn.
Hlutverk bæjarstjóra
Bæjarstjóri er æðsti yfirmaður starfsfólks sveitarfélagsins og ber ábyrgð á daglegri stjórnsýslu bæjarins. Hann tryggir að starfsemi sveitarfélagsins sé í samræmi við lög, samþykktir og ákvarðanir kjörinna fulltrúa.
Bæjarstjóri situr fundi bæjarstjórnar og hefur þar málfrelsi, tillögurétt og bókunarrétt. Hann hefur ekki atkvæðisrétt nema hann sé jafnframt kjörinn fulltrúi í bæjarstjórn. Þá á hann einnig rétt á setu á fundum nefnda og ráða sem bæjarstjórn skipar.
Hlutverk bæjarstjóra er að undirbúa fundi bæjarstjórnar, bæjarráðs og annarra nefnda þannig að mál séu vel upplýst áður en ákvörðun er tekin. Hann sér jafnframt um að samþykktar ákvarðanir komist til framkvæmda, nema bæjarstjórn hafi falið öðrum það hlutverk.
Bæjarstjóri er prókúruhafi sveitarfélagsins og getur, með samþykki bæjarstjórnar, veitt öðrum starfsmanni prókúru. Hann undirritar skjöl sem fela í sér skuldbindingar fyrir sveitarfélagið, svo sem vegna kaupa og sölu fasteigna, lántöku, ábyrgða og annarra ráðstafana sem krefjast samþykkis bæjarstjórnar.
Hafa samband við bæjarstjóra
Hægt er að panta viðtal við bæjarstjóra í þjónustuveri Grindavíkur með því að senda póst á grindavik@grindavik.is eða gegnum síma 420-1100.