Álagning fasteignagjalda 2026 - Lækkun á skattprósentu og rafræn birting

• Fréttir
• 5. febrúar 2026

Nú liggur fyrir álagning fasteignagjalda í Grindavíkurbæ fyrir árið 2026. Vegna þeirra aðstæðna sem ríkja hefur bæjarstjórn ákveðið að koma til móts við eigendur íbúarhúsnæðis og lækka álagningarprósentu fasteignaskatts úr 0,3% í 0,25%.

Hér að neðan má finna hagnýtar upplýsingar um hvernig nálgast má álagningarseðla, hvað felst í gjöldunum og hverjir eiga rétt á afslætti.

Hvar finn ég seðilinn?

Álagningarseðlar eru eingöngu birtir rafrænt. Hægt er að nálgast þá á vefnum island.is undir „Mínar síður“ (innskráning með rafrænum skilríkjum). Kröfur vegna gjaldanna birtast svo sjálfkrafa í heimabanka greiðanda.

Gjalddagar og fyrirkomulag

Gjöldunum er dreift á 10 gjalddaga yfir árið til að jafna greiðslubyrði. Fyrsti gjalddagi er 1. febrúar og sá síðasti 1. nóvember. Athugið: Ef heildarupphæð gjalda er 25.000 kr. eða lægri, innheimtist hún öll á fyrsta gjalddaga.

Hvað er ég að greiða?

Fasteignaskattur er lagður á samkvæmt lögum um tekjustofna sveitarfélaga nr. 4 frá 1995 með síðari breytingum, sbr. 3. gr. laganna. Fasteignagjöld eru samsett úr nokkrum liðum sem standa straum af þjónustu og rekstri sveitarfélagsins:

• Fasteignaskattur: Skattur af fasteignamati húss og lóðar. Bæjarstjórn hefur lækkað prósentu á íbúðarhúsnæði úr 0,30% í 0,25% fyrir árið 2026 til að létta byrðar eigenda.
• Lóðarleiga: Gjald fyrir afnot af landi í eigu sveitarfélagsins (ef við á).
• Vatnsgjald: Gjald fyrir aðgang að köldu neysluvatni.
• Fráveitugjald: Gjald vegna reksturs og viðhalds á holræsakerfi bæjarins.

Álagningarstuðlar fasteignaskatts og annarra fasteignagjalda eru ákveðnir árlega af bæjarstjórn og eru þessir fyrir árið 2026:

• A-liður (Íbúðarhúsnæði): Fasteignaskattur 0,25%, vatnsgjald 0,045%, fráveitugjald 0,15% og lóðaleiga 0,5% af fasteignamati húss og lóðar
• B-liður (Opinbert húsnæði): Fasteignaskattur 1,32% og lóðaleiga 2% af fasteignamati húss og lóðar
• C-liður (Atvinnuhúsnæði): Fasteignaskattur 1,45%, vatnsgjald 0,20%, fráveitugjald 0,20% og lóðaleiga 1,6% af fasteignamati húss og lóðar

Athugið að lóðaleiga er eingöngu reiknuð af fasteignamati lóðar.

Afsláttur til eldri borgara og örorkulífeyrisþega

Grindavíkurbær býður upp á tekjutengdan afslátt af fasteignaskatti og fráveitugjaldi til þeirra sem eru 67 ára og eldri eða eru öryrkjar (75% örorka eða meira) með vísan í reglur um afslátt á fasteignagjöldum tekjulágra elli- og örorkulífeyrisþega. Afslátturinn er reiknaður út frá tekjum ársins 2025 og getur verið 25%, 50%, 75% eða 100%. Skila þarf inn staðfestu skattframtali á álagningarári vegna tekna og eigna fyrra árs, þ.e. skattframtali 2026.

Tekjuviðmið fyrir 2026:

• 100% afsláttur: Einstaklingar með tekjur undir 6.172.589 kr. (Hjón: 9.876.142 kr.)
• 75% afsláttur: Einstaklingar með tekjur 6.172.590 – 6.815.567 kr. (Hjón: 9.876.143 – 10.904.907 kr.) 
• 50% afsláttur: Einstaklingar með tekjur 6.815.568 – 7.458.545 kr. (Hjón: 10.904.908 – 11.933.672 kr.)
• 25% afsláttur: Einstaklingar með tekjur 7.458.546 – 8.101.523 kr. (Hjón: 11.933.673 – 12.962.436 kr.)

Sækja þarf um afsláttinn árlega og er það gert með því að skila staðfestu skattframtali í afgreiðslu þjónustuvers Grindavíkurbæjar, Víkurbraut 62 eða gegnum tölvupóst á netfangið grindavik@grindavik.is.

Þess ber að geta að fasteignamat í Grindavík hefur ekki hækkað frá því sem það var 31. desember 2023.

Ef spurningar vakna hvetjum við íbúa til að hafa samband við þjónustuver Grindavíkurbæjar í síma 420-1100 eða senda fyrirspurn á netfangið grindavik@grindavik.is.

• Síðast uppfært: 5. febrúar 2026