Tilkynning um breytt fyrirkomulag sorpmála í Grindavík

• Fréttir
• 13. nóvember 2024

Grindavíkurbær og Kalka Sorpeyðingarstöð sf. hafa verið að skoða breytt fyrirkomulag sorpmála í Grindavík. Málið var tekið fyrir í innviðanefnd þann 10. október og í bæjarráði 22. október þar sem eftirfarandi breytingar voru lagðar fram og samþykktar og gert ráð fyrir að taki gildi í nóvember.

Á næstu vikum verða öll sorpílát frá íbúðarhúsum í bænum fjarlægð en þau verða þrifin og geymd á plani Kölku í Innri Njarðvík þar til þörf verður á þeim aftur.

Í stað sorpíláta við hvert hús verður grenndarstöð með flokkun sorps sett á bílastæði Grunnskólans við Ásabraut. Fyrirkomulagið er áþekkt og gerist í sumarhúsabyggðum þar sem byggð er dreifð. Töluverð hagræðing felst í þessari breytingu fyrir bæjarsjóð en vonir standa til þess að fyrirkomulagið henti þeim íbúum sem dvelja í Grindavík við núverandi aðstæður.   

Ferðum íbúa á gámastöðina við Sundabraut (austan við bæinn) fer fækkandi og mun ekki borga sig að reka hana mikið lengur. Stöðinni verður þó ekki lokað fyrr en eftir einhverjar vikur. Ennþá fæst því tími til að henda þar sorpi og losa sig við stærri hluti ef þarf. 

Beðist er velvirðingar á þeim óþægindum sem þetta hefur í för með sér en fólk er beðið um að hafa í huga þessar breytilegu aðstæður í bænum og að fyrirkomulag sorphirðu þurfi að taka mið af forsendum hverju sinni.   
 

• Síðast uppfært: 13. nóvember 2024