Hvaða púkar eru þetta sem fara á stjá á þrettándanum?

• Fréttir
• 9. janúar 2023

Þrettándinn kann að falla í skuggann af stóru hátíðunum, jólum og áramótum. Fyrir marga er þetta dagurinn sem jólaskrautið er tekið niður og lagt til hliðar í 11 mánuði. Dagurinn á sér hins vegar langa sögu og ýmislegt á að ganga á þann dag. Þannig fara t.d. selir úr hömum sínum, kirkjugarðar rísa, álfar flytjast búferlum og kýr tala mannamál.

Í Grindavík hefur lengi verið haldið upp á þrettándann með álfasöngvum, púkum og flugeldasýningu. Þrettándinn er síðasti dagur jóla og Kertasníkir heldur heim til sín, síðastur jólasveinanna. Einhverjir hafa líka gert vel við sig í mat og nefnist það að rota jólin.

Áratugum saman hafa börn í Grindavík notað tækifærið og bankað á dyr á heimahúsum í kringum áramót. Börnin klæðast þá búningum og sníkja sælgæti í pokann sinn með því að spyrja „viltu gefa mér gott í pokann?“. Grímuklæddu börnin nefnast púkar og þekkist þessi siður í fáum sveitarfélögum öðrum en Grindavík. Búningarnir hafa breyst í takt við tíðarandann og má í dag sjá ofurhetjur, prinessur og poppstjörnur innan um púka og aðrar furðuverur.

Upphaflega var líklega gengið í hús á gamlárskvöld en síðar færðist siðurinn yfir á þrettándann. Í ár er ekki ólíklegt að púkarnir fari á stjá eftir kl. 16 á þrettándanum. Hátíðarhöld á vegum Grindavíkurbæjar, Björgunarsveitarinnar Þorbjarnar og fyrirtækja í Grindavík hefjast kl. 19:00 í Kvikunni.

Myndin er samsett úr ljósmyndum sem finna má í safni Grindavíkurbæjar frá 2003-2020

• Síðast uppfært: 9. janúar 2023