Íbúar Grindavíkur fengu á dögunum veglega haustdagskrá menningarhúsanna í Grindavík inn um bréfalúguna. Í haust verður boðið upp á fjölbreytta dagskrá fyrir almenning, fjölskyldur, skólahópa og börn í Kvikunni og Bókasafni Grindavíkur.
Fyrsti viðburðurinn í Kvikunni þetta haustið fór fram 15. september þegar uppistandshópurinn VHS sýndi sýninguna VHS krefst virðingar við mikil hlátrasköll gesta. Fjölmargir Grindvíkingar hafa t.d. lagt leið sína í Kvikuna í vikunni enda hafa þar farið fram fyrirlestrar, námsskeið, kóræfing og krakkasmiðja í tengslum við starfsdag í skólum sveitarfélgsins.
Húsið er nú bókað vegna fyrirlestra, uppákoma og viðburða nær alla virka daga fram í desember. Má nefna fjölbreytta opna viðburði alla miðvikudaga, opið hús fyrir börn á fimmtudögum og foreldramorgna á föstudögum.
Mikil breyting hefur orðið í starfsemi hússins eftir að ákveðið var að færa sýningahald úr stóra salnum á neðri hæðinni á efri hæð hússins. Hönnuður sýningarinnar, Björn G. Björnsson, sá jafnframt um hönnun sýningarinnar á efri hæðinni.
Var þessi ákvörðun tekin með það að markmiði að nýta stóra salinn fyrir fjölbreytta menningarviðburði í þágu Grindvíkinga. Er horft til þess að salurinn verði svokallaður „black box“ salur og hefur hann gengið undir vinnuheitinu „Svartsengi“.
Meðal viðburða sem farið hafa fram í salnum þrátt fyrir erfiða tíma til samkomuhalds má nefna upptökur á þorrablóti UMFG, listasmiðjur og námskeið fyrir börn auk kaffiboðs í tengslum við 17. júní.
Grindvíkingar eru hvattir til að hafa samband hafi þeir áhuga á viðburðahaldi í húsinu gegnum netfangið kvikan@grindavik.is eða Facebook síðu Kvikunnar.
Meðfylgjandi myndir eru af salnum fyrir sýningu VHS og frá því töframaðurinn Einar mætti til leiks í tilefni af starfsdegi skólanna í morgun.