Rafrænt þorrablót Grindvíkinga verður 20. febrúar

• Fréttir
• 12. febrúar 2021

Öllum landsmönnum verður boðið á þorrablót Grindvíkinga í ár sem verður þó með öðru sniði líkt og annars staðar á landinu. Rafrænt blót UMFG fer fram laugardagskvöldið 20.  febrúar næstkomandi og verður streymt frá Kvikunni, menningarhúsi Grindvíkinga. Hægt verður að nálgast streymið á Facebook síðu Þorrablóts Grindvíkinga og Facebook síðu bæjarins. 

Bóndadagurinn markar upphaf þorrans sem hófst 22. janúar síðastliðinn. Það er síðan góan sem tekur við þorranum á konudaginn sem er sunnudaginn 21. febrúar. Það má því ekki tæpara standa hjá okkur Grindvíkingum en rafrænt þorrablót fer fram á síðasta degi þorrans. 

Fjölskipuð þorrablótsnefnd hefur undanfarin ár haft veg og vanda af skipulagningu mörg hundruð manna blóti sem farið hefur fram í íþróttamiðstöð Grindavíkur. Vegna samkomutakmarkana verður slíkt ekki í boði en í staðinn verður boðið upp á skemmtun í beinni. Nefndin hefur undanfarin misseri unnið að skipulagningu blótsins og fengið afnot af stóra sal Kvikunnar þar sem áður var saltfisksýningin Saltfiskur í sögu þjóðar, sem nú er komin á efri hæðina. 

Í byrjun febrúar var hluti skemmtinefndar (karlmenn) að störfum og voru þeir Sigurður Þyrill Ingvason og Ingimar Waldorff teknir tali en viðtalið er í meðfylgjandi frétt. 

• Síðast uppfært: 12. febrúar 2021