Grindavíkurbær kynnir tillögu að deiliskipulagi á nýju hverfi norðaustan við Hópsbraut. Stefnt er á að setja deiliskipulagið í auglýsingu á næstu vikum. Íbúafundur vegna deiliskipulagsins fer fram þann 9.september nk. í Gjánni kl. 18:00. Eftir að skipulagið fer í auglýsingu þá hafa íbúar og aðrir hagsmunaaðilar 6 vikur til að koma með ábendingar eða gera athugasemdir við deiliskipulagstillöguna. Hér meðfylgjandi eru uppdrættir, greinagerð og skilmálar deiliskipulagsins. 

Uppbygging í Grindavík hefur gengið vel undanfarin ár og mikil ásókn hefur verið í nýjar lóðir. Lítið er eftir af lóðum samkvæmt samþykktum deiliskipulagsáætlunum. Unnið er að gerð deiliskipulagsins til að mæta fyrirhugaðri eftirspurn lóða fyrir íbúðarbyggð. Skipulagssvæðið er um 30 hektarar að stærð. Áætlað er að á svæðinu rísi blönduð íbúðarbyggð ásamt leikskóla sem samræmist gildandi Aðalskipulagi Grindavíkur 2010-2030. 

Megináhersla deiliskipulagsins er að afmarka lóðir og skilgreina byggingarreiti fyrir íbúðarbyggð og samfélagsþjónustu. Þá þarf að setja skilmála fyrir uppbyggingu innan fyrirhugaðs íbúðar-og þjónustusvæðis í samræmi við lög og reglur. Einnig verður lagður grunnur að vönduðum frágangi bygginga og uppbyggingar innan svæðisins. Þá er eitt markmiðið að stuðla að sjálfbæru og umhverfisvænu skipulagi með heildstæðu yfirbragði í sátt við umhverfi og samfélag. Skilgreindar verða öruggar umferðaleiðir fyrir akandi, hjólandi og gangandi vegfarendur. Gert er ráð fyrir að fjöldi íbúðaeininga verði á bilinu 307 til 384. 

Atli Geir Júlíusson, sviðsstjóri skipulags- og umhverfissviðs.
 

Íbúabyggð norðan Hópsbrautar, með loftmynd
Skipulags- og byggingaskilmálar
Skilmálatafla
Íbúðabyggð norðan Hópsbrautar, án loftmyndar

• Síðast uppfært: 24. ágúst 2020