Núna ætlum við að fjalla um fallega gönguleið í hjarta Grindavíkur en það er Hópsneshringurinn.
Margir Grindavíkingar kannast við Hópneshringinn sem er falleg leið. Útivistarhringurinn er vinsæll meðal heimamanna en er minna þekktur á meðal utanbæjarfólks og ferðamanna. Leiðin er auðveld og hentar því flest öllum.
Hringurinn er vinsæl göngu-, hjóla- eða hestaleið en á leiðinni má sjá skipsflök og gamlar minjar. Þar má finna leifar af skipum sem strönduðu þar á 20.öld, önnur forn fiskibyrgi og hleðslur. Kraftur hafsins hefur þeytt þessum skipum upp á þurrt landið eftir að þau strönduðu við Hópsnesið á sínum tíma. Appelsínuguli Hópsnesvitinn var reistur árið 1928 og stendur við miðjan hringinn.
Hópsnesið er sannkölluð náttúruperla í hjarta Grindavíkur. Hópsnesið er eina nesið á landinu sem heitir tveimur nöfnum, Hópsnes vestan megin og Þórkötlustaðarnes hægra megin. Gönguleiðin tekur mann að sjónum og þar sér maður kraft hafsins. Á leiðinni í gegnum Þórkötlustaðarnes sér maður einnig gamlar húsarústir, fallega fjöru og einstaka náttúru. Einnig er þar að finna fyrstu höfnina sem var í Grindavík. Útsýnið frá gönguleiðinni er fjölbreytt, bæði er gott útsýni yfir Grindavík að Þorbirni, yfir sjóinn og út í hverfi. á leiðinni má einnig sjá upplýsingaskilti um sjóströndina. Gönguleiðin er tilvalinn gönguhringur fyrir alla fjölskylduna í góðu veðri en hún tekur rétt rúman klukkutíma.
Göngutími: 1 klukkustund
Lengd: Ef gengið er frá smábátahöfninni yfir í Þórkötlustaðarhverfi er lengd göngunnar um 4 kílómetrar. Ef genginn er lengri hringurinn framhjá tjaldsvæðinu að byrjunarstað er gangan um 6 kílómetrar.
Göngubyrjun/endir: Við smábátahöfnina eða uppi í Þórkötlustaðarhverfi við réttarsvæðið.
Leiðarlýsing: Gengið er um malarveg.