Fasteignagjöld í Grindavík eru áfram með þeim hagstæðustu í landinu. Þegar rýnt er í skýrslu Byggðastofnunar má sjá hvernig þessar álögur skiptast á milli stærstu þéttbýliskjarna landsins.
Byggðastofnun fær Þjóðskrá Íslands árlega til að reikna út fasteignamat á sömu viðmiðunarfasteigninni á 26 þéttbýlisstöðum á landinu. Fasteignagjöld eru reiknuð út af Byggðastofnun samkvæmt álagningarreglum ársins 2020 eins og þær eru í hverju
sveitarfélagi, út frá því fasteignamati sem Þjóðskrá reiknar og gildirfrá 31. desember 2019. Viðmiðunareignin er einbýlishús sem er 161,1 m2 að grunnfleti. Stærð lóðar er 808 m2 og rúmmál eignar er 476 m3. Útreiknað fasteignamat þessar eignar í Grindavík er 39,4 milljónir og er það hækkun um 10,68% frá því í fyrra. Grindavíkurbær hefur þrátt fyrir hækkun á mati fasteigna passað upp á gjöldin og hafa þau t.a.m. ekki hækkað nema um 5,6% á milli ára. Neðar í fréttinni má sjá hversu lágt bæði fráveitu- og vatnsgjald er í Grindavík m.v. annars staðar á landinu.
Þrátt fyrir hækkun á fráveitugjaldi í Grindavík er sveitarfélagið með lægsta gjaldið á öllu landinu eða 27 þúsund krónur á ári. Grindavík er með lágt vatnsgjald eða um 22 þúsund krónur.
Sorpgjald í Grindavík er í meðallagi en ekki er einfalt að bera saman gjöld milli sveitarfélaga þar sem þjónustan er mismunandi.
Fasteignagjöld samanstanda af fasteignaskatti (sem reiknaður er sem prósenta af heildarmati eignar), lóðarleigu, fráveitugjaldi, vatnsgjaldi og sorpgjöldum. Fasteignaskattur er prósenta af heildarmati en ekki bara húsmati. Í flestum tilfellum er lóðarleiga prósenta af lóðarmati og fráveitugjald prósenta af heildarmati. Sorpgjald er alltaf fast gjald. Vatnsgjald er ýmist prósenta af heildarmati eða samsetning fasts gjalds og fermetrafjölda húsnæðis með nokkrum útfærslum.
Áhugavert er að skoða sundurliðun gjaldanna en á meðfylgjandi mynd má sjá hvernig þessum málum er háttað hjá þessum stærri þréttbýliskjörnum landsins. Fráveitu- og vatnsgjald er áberandi lágt í sveitarfélaginu.
Hægt er að skoða betur samanburð milli þéttbýliskjarna á landinu með því að opna skýrslu Byggðastofnunar sem nálgast má hér.