Nú er sumarið að ganga í garð og margir að huga að skemmtilegri útivist. Í allt sumar ætlum við að koma með hugmyndir að góðum gönguleiðum í kringum Grindavík. Fyrsta gönguleiðin er Skógfellstígurinn. Skemmtileg leið frá Vogunum yfir til Grindavíkur.
Göngutími: 5-6 klst
Lengd göngu: 16 km
Göngubyrjun: Við upphafsskilti Skógafellavegar við Vogaheiði. Ef farið er á bíl er hægt að leggja á stæði við hringtorg Vogaafleggjara og labba stuttan spöl meðfram Reykjanesbraut að skiltinu (um 1 km).
Gönguendir: Við vörðu Skógfellstígar hjá Hópinu (knattspyrnuhús).
Leiðarlýsing: Stórskemmtileg leið um merka þjóðleið milli Voga og Grindavíkur sem vermenn fyrri tíma notuðu. Gönguleiðin er talin um 700 ára gömul. Slóðin er meitluð í klappir og er gönguleiðin merkt með bæði stikum og vörðum. Gönguleiðin er skemmtileg í góðu veðri en á meðal þess sem landslagið hefur upp á að bjóða er að ganga meðfram litla og stóra Skógfelli ásamt því að enda gönguna meðfram Gálgaklettum hjá Grindavík.
- Í allt sumar ætlum við að koma með hugmyndir að góðum gönguleiðum í kringum Grindavík, ekki er um skipulagðar ferðir að ræða.