Dagskrá Sjóarans síkáta í Grindavík 2018

• Sjóarinn síkáti
• 28. maí 2018

Dagskrá Sjóarans síkáta 2018 er nú aðgengileg hér á vefsíðunni en henni verður einnig dreift í hús á næstu dögum. Sjóarinn síkáti er bæjarhátíð okkar Grindvíkinga sem byggst hefur upp í kringum glæsilega hátíðardagskrá um sjómannahelgina. Hátíðin hefur vaxið í vinsældum frá ári til árs og er orðinn fastur punktur í tilveru margra Íslendinga sem sækja hátíðina heim ár hvert. Líkt og undanfarin ár er dagskráin glæsileg og hlaðin fjölmörgum skemmtilegum viðburðum fyrir alla fjölskylduna, og þá ekki síst fyrir yngstu kynslóðina.

Sjómannadagshelgin er 1. - 3. júní í ár en dagskráin á Sjóaranum teygir sig töluvert lengra og verður ýmislegt um að vera í bænum okkar í aðdraganda helgarinnar. Það ættu allir að finna eitthvað við sitt hæfi á Sjóaranum í ár. Hátíðarsvæðið er við Kvikuna og hátíðarsviðið sjálft á sínum stað fyrir neðan Kvikuna. Sviðið verður sérstaklega veglegt í ár enda risatónleikar á dagskrá á laugardagskvöldinu þar sem margir af ástsælustu söngvurum þjóðarinnar koma fram; Friðrik Dór, Eyþór Ingi, Sigga Beinteins og Grétar Örvars úr Stjórninni, Pálmi Gunnarsson, Ágústa Eva, Þorvaldur Halldórsson og Grindvíkingarnir Íris og Tómas ásamt 9 manna hljómsveit. Glæsileg söngskemmtun með íslenskum lögum sem allir þekkja og geta sungið með. Tónleikarnir hefjast kl. 21:00 en frá kl 20:00 verður hópur rappara með með sviðið til umráða. 

Ýmsir viðburðir og uppákomur hafa fest sig í sessi og verða á sínum stað. Mikil áhersla er á dagskrá fyrir börnin á laugardag og sunnudag. Leiktækin verða á sínum stað á hátíðarsvæðinu, bæði frá Skemmtigarðinum og Sprell.is.

Glæsileg dagskrá verður líka hjá veitingahúsum og skemmtistöðum hér í bæ. Fish house hefur t.a.m. tjaldað öllu til og býður uppá þrjá flotta viðburði og þá verður hið árlega ball körfuknattleiksdeildarinnar að sjálfsögðu á sínum stað aðfararnótt sunnudags.

Dagskráin er auðvitað alltof löng til að telja hana alla upp hér. Hana má lesa í heild sinni hér að neðan og er sjón sögu ríkari. Við hlökkum til að sjá ykkur í Grindavík á Sjóaranum síkáta!

ATH! Meinleg villa um opnunartíma sundlaugarinnar slæddist inn í dagskrána. Réttur opnunartími laugardag og sunnudag er 09:00-18:00

Dagskrá Sjóarans síkáta 2018 - vefútgáfa

Sjóarinn síkáti er á Facebook í gegnum Grindavíkurbæ

• Síðast uppfært: 28. maí 2018