Félagar úr Unglingadeildinni Hafbjörgu á rústabjörgunaræfingu í Rússlandi

• Fréttir
• 4. ágúst 2015

Þessa dagana stendur yfir stór alþjóðleg rústabjörgunaræfing fyrir ungmenni á aldrinum 15-17 ára í rússnesku borginni Noginsk. Æfingin kallast USAR eða „Urban Search and Rescue basic training for youngsters“. Alls taka 11 þjóðir þátt í æfingunni í ár sem stendur yfir í níu daga og lýkur með stórri 14 tíma rústarbjörgunaræfingu þar sem allar þjóðirnar vinna saman. Fimmtán manna föngulegur hópur lagði af stað frá Íslandi síðastliðinn sunnudag en í hópnum eru fjórir Grindvíkingar.

Otti Rafn Sigmarsson, umsjónarmaður unglingadeildarinnar Hafbjargar, heldur utan um hópinn en hann hefur undanfarin misseri unnið hörðum höndum að skipulagningu æfingarinnar í samvinnu við umsjónarmenn unglingadeilda víðsvegar úr heiminum. Með honum frá Grindavík eru svo þrír félagar úr Hafbjörgu, þau Halla Vigdís Jóhannsdóttir, Harpa Dögg Jónsdóttir sem er leiðbeinandi í verkefninu og Ólafur Þór Unnarsson.

Morgunblaðið greindi frá för hópsins en hægt er að fylgjast með hópnum í máli og myndum á Facebook, þaðan sem myndin sem fylgir fréttinni er fengin.

• Síðast uppfært: 4. ágúst 2015