Lions og Kvenfélagið gefa öryggisvesti fyrir börn til Brimfaxa

• Fréttir
• 29. janúar 2014

Haustið 2013 kom félagsmaður Brimaxa að tali við æskulýðsnefnd um öryggi barna á hestbaki. Þar sem hún er móðir og börn hennar stunda hestamennsku mikið voru öryggismál hennir ofarlega í huga og þá notkun barna á öryggisvestum.

Öryggisvesti eru ekki almenn eign og því er gríðarlegur ávinningur að allir ungir knapar hafi aðgengi að vestum sem eykur öryggi barna í hestaíþróttinni.

Formaður æskulýðsnefnar tók vel í málið og fór að vinna í því að fá styrki til að kaupa öryggisvesti fyrir Brimfaxa sem myndu verða aðgengileg fyrir alla félagsmenn af yngri kynslóðinni. Lionsklúbburinn í Grindavík og Kvenfélag Grindavíkur sáu sig fært um að leggja þessu góða málefni lið en þeim þótti þetta hafa mikið forvarnar- og öryggisgildi fyrir börn. Hestar og Menn voru með tilboð á vestum og gáfu þeir 5% aukaafslátt til Brimfaxa.

Á framhaldsaðalfundi Brimfaxa afhentu Lions og Kvenfélagið vestin til Brimfaxa. Lions gaf fjögur vesti merkt Lions fyrir þau minnstu og Kvenfélagið gaf þrjú vesti fyrir þau eldri.

Hestamannafélagið Brimfaxi vill þakka Lions og Kvenfélaginu fyrir þessa rausnalegu gjafir, þar sem þessi styrkur er ómetanlegur.

Á efri myndinni eru m.a. fulltrúar Kvenfélags Grindavíkur og Hilmar Knútsson formaður Brimfaxa við afhendinguna.

• Síðast uppfært: 29. janúar 2014