Læsisátak í 2.bekk í fullum gangi

• Grunnskólafréttir
• 23. mars 2023

Í lestrarátakinu sem nú er í gangi hafa nemendur í 2. bekk verið að lesa aukalega heima með foreldrum/forráðamönnum og skoðað orð sem þau ekki þekkja.  Markmiðið er að læra að minnsta kosti eitt nýtt orð á dag.

Börnin skrifa orðið sem þau skoða heima og í skólanum segja þau frá því og útskýra fyrir bekkjarfélögum. Orðið er skrifað á blað og síðan hengt upp á orðavegg. Börnin hafa líka unnið verkefnið orð dagsins þar sem þau skoða orðið út frá merkingu, setja það í setningu/spurningu, finna samheiti og andheiti, skoða sérhljóða og samhljóða og fleira.

Börnin fá límmiða á bókamerki sem er merkt þeim í hvert skipti sem þau koma með orð að heiman. Þetta hefur gengið vel og mikil spenna á hverjum morgni að segja frá sínu orði. Í skólanum vinnum við með bókaflokkinn Lita fólkið með stóru draumana. Við byrjuðum á bókinni um Michael Jordan. Skoðuðum orð og merkingu þeirra, ætlum að teikna mynd af þessar körfuboltahetju og hanna skó eins og eru nefnd eftir honum.

Í næstu viku ætlum við að skoða fleiri bækur í þessum bókaflokki. Ætlunin er að hvert barn geri sér litla orðabók. Við förum á bókasafnið þar sem starfsmaður ætlar að aðstoða okkur við gerð á bókakápu á orðabókina, en til þess ætlum við að endurnýta gamlar bækur.

Kennarar hafa hvatt börnin til þess að taka að minnsta kosti eina bók úr bókaflokknum Litla fólkið með stóru draumana til þess að lesa heima með foreldrum/forráðamönnum. Margt skemmtilegt framundan í þessari vinnu og mikilvægt að foreldrar haldi áfram að lesa með sínu barni og skoða og ræða orð.  

Áfram 2. bekkur😊

• Síðast uppfært: 23. mars 2023