Bergrisinn vaknar-landvættur

• Grunnskólafréttir
• 10. maí 2021

Bókin Bergrisinn vaknar, lesbók, kort og litabók var gjöf til allra 1.-3.bekkja á Reykjanesi frá Reykjanes jarðvangi.  Bókin fjallar í grunninn um landvætti og þeirra hlutverk og trú okkar á að þeir passi landið okkar og viðkvæma náttúru. Ákveðið var að nýta þessa góðu gjöf og vinna með bókina í Byrjendalæsi í 3. bekk hér í Grindavík. 

Bókin var lesin, verkefni sem tengdust atburðarrás, merkum stöðum, samsettum orðum, orðflokkum og fleiru voru unnin í hópavinnu. Nemendur máluðu myndir af bergrisanum og fleiri persónum s.s. Skottu, Brimi og Berglindi. Þetta var frábær vinna og í lok tímabilsins var farið í rútu um Reykjanes meðal annars að Gunnuhver, Reykjanesvita, brúnni milli heimsálfa og út á Garðskagavita. Fuglalíf, vitar, bátar og margt sem fyrir augu bar vakti mikinn áhuga nemenda. Það er mjög jákvætt þegar börn fá bók að gjöf frá fyrirtækjum og stofnunum. Með þeim hætti eru börnunum send skýr skilaboð um mikilvægi bókarinnar á okkar tímum.

Bergrisinn vaknar-veröld vættana er eftir Margréti Tryggvadóttur og Silviu Pérez. Verkefnið var styrkt af Markaðsstofu Reykjaness, Þekkingarsetri Suðurnesja, Sóknaráætlun Suðurnesja og Ferðamálastofu. Reykjanes Jarðvangur stóð að útgáfu.

• Síðast uppfært: 11. maí 2021