Vinabekkir fóru Gleðileiðina saman

• Grunnskólafréttir
• 18. september 2020

Í dag hittust vinabekkir Grunnskóla Grindavíkur hér í starfsstöðinni á Ásabraut. Á hverju skólaári hittast vinabekkir í tvígang og gera eitthvað skemmtilegt saman. 1.bekkur hittir 7.bekk, 2.bekkur er með 6.bekk, 3.bekkur og 8.bekkur eru saman, 4.bekkur og 10.bekkur og svo hittast 5. og 9.bekkur.

Umsjónarkennarar skipulögðu fjölmargt skemmtilegt og meðal annars fóru bekkir saman í fjöruferð og í Hópið. Að því loknu borðuðu vinabekkirnir saman hádegismat á Ásabrautinni áður en farin var hin svokallaða Gleðileið.

Gleðileiðin markaði endapunktinn á Uppbyggingadögunum en þá fóru allir bekkir saman niður að gömlu kirkjunni og gengu eða hlupu saman að Landsbankatúninu. Á leiðinni fengu þau yfir sig liti í anda "Colour run" sem margir þekkja en litirnir sem notaðir voru eru einkennislitir Uppbyggingarstefnunnar.

Óhætt er að segja að Gleðileiðin hafi verið vel heppnuð, það mátti sjá bros á hverju andliti og ljóst að nemendur fóru sælir heim í helgarfrí.

Hér fyrir neðan má sjá myndir frá viðburðum dagsins.

• Síðast uppfært: 21. september 2020