Ari Eldjárn með uppistand í Kvikunni

• Kvikufréttir
• 1. október 2021

Það er okkur mikil ánægja að bjóða Grindvíkinga velkomna á aðra uppistandssýningu haustsins í Kvikunni þann 11. nóvember næstkomandi.  VHS uppistandshópurinn tróð upp í viðburðasal Kvikunnar í september en nú er komið að hinum eina sanna Ara Eldjárn.  Þetta er í fyrsta sinn í tvö ár sem Ari fer á flakk með uppistand og því er sérstaklega gaman að geta tekið á móti honum hér í Grindavík núna.

Ara Eldjárn þarf vart að kynna. Hann hefur slegið í gegn á Íslandi sem og erlendis og margir muna líklega eftir honum í búningi IKEA starfsmanns í áramótaskaupinu og með eigin sýningu Pardon my Icelandic sem gefin var út á Netflix í miðju Covid-fári.

Nú stendur hann fyrir skemmtilegri og tilraunakenndri uppistandssýningu í Grindavík þar sem hann prófar nýtt grín. Sýningin varir í um klukkustund þar sem Ari fer á flug með áður óbirt efni. Sumt verður lesið af blöðum, annað samið á staðnum og brandaranir ýmist fyndnir eða ekki.

Hér er um að ræða einstakt tækifæri til að reka augun inn á verkstæðið og sjá hvernig uppistand verður til og slípast. Áheyrendur upplifa atriði sem ekki verða endurtekin en sjá líka frumdrög að stærri atriðum sem verða flutt í sýningum á borð við Áramótaskopið.

Miðasala er hafin á TIX hér.

Missið ekki af áhugaverðri tilraun þar sem allt fær að fljúga!

• Síðast uppfært: 1. október 2021