Skipulagðar rútuferðir frá Grindavík að gosgönguleiðinni

• Kvikufréttir
• 31. mars 2021

Frá og með morgundeginum 1. apríl  verður boðið upp reglubundnar rútuferðir frá Grindavík upp að stikuðu gönguleiðinni að gosinu í Geldingadölum og aftur til baka niður í bæ. Keyrt verður á heila og hálfa tímanum gegn vægu gjaldi. Fyrsta ferð er klukkan 8:00 í fyrramálið og farið verður á hálftíma fresti til klukkan 22:00. Eftir klukkan 22:00 hætta rúturnar að ganga.

Ferðirnar eru skipulagðar í samráði við aðgerðarstjórn viðbragðsaðila á svæðinu.

Á meðfylgjandi korti má sjá bæði hvar hægt er að leggja bílum og hvar hægt er að bíða eftir rútu innan bæjarins. 

Um er að ræða stoppistöð við Nettó (Gamla festi) á Víkurbraut, við Kvikuna menningarhús á Hafnargötu og við Hópið fjölnota íþróttahús á Austurvegi. 
Gætt verður að sóttvörnum og grímuskylda er í rútunum. 

Ferðirnar eru á vegum einkaaðila. 
 

• Síðast uppfært: 1. apríl 2021