Upphaf Grænna daga í Kvikunni

• Kvikufréttir
• 11. september 2020

Í september fara fram Grænir dagar í Kvikunni. Dagskráin er fjölbreytt en allir viðburðirnir eru “grænir” í einhverjum skilningi. Fyrsti viðburður haustsins fór fram í gærkvöldi en þá leiðbeindi Gugga ‘okkar’ í Blómakoti hópi fólks um gerð haustkransa. Þátttakendur komu með efnivið sjálfir sem þeir höfðu safnð úr görðum og náttúrunni en fengu krans og vír. Myndir frá því í gær má sjá hér fyrir neðan.

Mikill áhugi var á námskeiðinu og þurfti að takmarka skráningu sökum þess. Þátttakendur fóru ánægðir heim, hver með sinn krans. Gaman var að sjá hversu ólíkir kransarnir urðu þrátt fyrir að bæði efniviður og aðferð væri sú sama.

Næst á dagskrá Grænna daga er krakkasmiðja sem fer fram á starfsdegi Grunnskóla Grindavíkur n.k. þriðjudag 15. september kl. 10:00-12:00. Krakkarnir taka með sér ílát, gjarnan eitthvað sem annars teldist rusl, s.s. krukku, dós, flösku, fernu eða annað sem getur orðið að lekkerum blómapotti. Í smiðjunni skreyta þau svo ílátið og fá litla plöntu með sér heim til að rækta í pottinum. Viðfangsefnið er því grænt í tvennum skilningi.

Smiðjan er ætluð börnum á grunnskólaaldri sem geta unnið sjálfstætt því ekki er hægt að bjóða upp á gæslu.

Einnig er möguleiki að börn komi í fylgd forráðamanns ef þess er óskað. 

Fimmtudagskvöldið 17. Sept. verður svo fyrirlestur um stofuplöntur með Vilmundi Hansen, Fjörumó laugardaginn 19. september. á hádegi og fimmtudagskvöldið 24. sept lýkur dagskrá Grænna daga með fyrirlestri Láru Lindar um grænna matarræði.

Við hvetjum alla til að kynna sér dagskránna hér á síðunni og á facebook.

Allir viðburðir eru opnir og þátttakendum að kostnaðarlausu.
 

• Síðast uppfært: 11. september 2020