Hvað á viðburðatorgið að heita?

• Kvikufréttir
• 18. mars 2020

Ákveðið hefur verið að efna til nafnasamkeppni fyrir viðburðatorgið við Seljabót, neðan við Kvikuna. Sem kunnugt er svæðið viðburðasvæði Grindvíkinga og hefur verið það síðan árið 2003 þegar teknir voru í notkun pallar í brekkunni. Meðal viðburða sem fram hafa farið á svæðinu eru Sjóarinn síkáti, hátíðarahöld í tengslum við 17. júní, þrettándagleði auk fjölda annarra viðburða. 

Í dagskrá viðburða er reglulega vísað til „hátíðarsvæðisins fyrir neðan Kvikuna“ eða „hátíðarsvæðisins við Seljabót fyrir neðan Kvikuna“. Hvort tveggja þykir langt og óþjált. Því er leitað til bæjarbúa eftir hentugu heiti á þetta verðmæta svæði sem er sameign okkar Grindvíkinga. Heitið sem valið verður skal sækja innblástur í sjósókn og sjávarútveg. 

Verðlaun verða veitt fyrir það nafn sem valið verður. Hægt er að koma tillögum til skila gegnum Facebook síðu Grindavíkurbæjar eða netfangið eggert@grindavik.is. Skilafrestur er til og með 31. mars nk. 

• Síðast uppfært: 25. maí 2020