Hvað og hvar er Virkjun?
Virkjun mannauðs á Reykjanesi hóf starfsemi sína 15. janúar 2009.  Í Virkjun er verið að byggja upp starfsemi fyrir íbúa á Reykjanesi sem leitar nýrra tækifæra í atvinnu eða námi. Þá er Virkjun ekki síður samkomustaður fólks sem vill nýta það áfall sem atvinnuleysi er hverjum og einum til að búa sig undir ný tækifæri í atvinnu með námi, námskeiðum eða mannbætandi tómstundum og menningarstarfsemi sem einnig er í boði í Virkjun.

Sveitarfélögin á Reykjanesi, verkalýðsfélög og fyrirtæki, menntastofnanir eins og Keilir, Fjölbrautaskóli Suðurnesja og Miðstöð símenntunar á Suðurnesjum hafa tekið höndum saman og bjóða upp á fjölbreytt nám fyrir þá sem leita nýrra tækifæra. Áhersla er lögð á hlýjar móttökur og skipulagða starfssemi, þar sem litið er á erfiða stöðu sem tækifæri. Leitað er eftir vinnuframlagi frá þeim stofnunum sem að standa, en ekki síður sjálboðliðastarfi. Almenningi er boðið að heimsækja Virkjun á daginn og fá þar fjölbreytilega þjónustu; sálfræðiaðstoð, fjármálaráðgjöf, náms og starfsráðgjöf o.s.frv. Vinnuaðstaða er fyrir ýmiskonar frumkvöðlastarfsemi og aðstoð við stofnun sprotafyrirtækja, aðstaða fyrir námstengd verkefni, fyrirlestrar, kynningar, náms- og starfsráðgjöf, persónuleg ráðgjöf og tómstundaverkefni, þátttakendum að kostnaðarlausu.

Í boði er heimilislegur hádegisverður og dagskrá alla daga þannig að hver og einn á að geta fundið verkefni við hæfi. Samhliða persónulegri ráðgjöf geta umbjóðendur Virkjunar sótt fyrirlestra, íþróttaæfingar, stofnað fyrirtæki o.s.frv. Kappkostað er að hafa ekki einungis starfssemi fyrir atvinnulausa á svæðinu heldur fer þar einnig fram önnur starfssemi, s.s. kennsla á vegum Keilis, Fjölbrautaskólans og Miðstöðvar símenntunar, nýsprotastarfssemi, lærdómsaðstaða er fyrir nemendur o.s.frv., þannig að "stimpillinn" atvinnuleysi verði ekki um of tengdur Virkjun.

Klárlega er þetta verkefni nýmæli til að takast á við atvinnuleysi og líta í raun á það sem tækifæri til sjálfseflingar, menntunar og að gera einstaklinginn hæfari til frekari þátttöku í atvinnulífinu þegar ný tækifæri skapst á vinnumarkaði.

Virkjun hefur yfir að ráða tæplega 1.600 fermetra húsnæði að Flugvallarbraut 740, Vallarheiði, Reykjanesbæ, sem Kadeco (Þróunarfélag Keflavíkurflugvallar) leggur verkefninu til. Húsið býður upp á mjög mikla notkunarmöguleika þar sem mikið af rýmum af öllum stærðum og gerðum er fyrir hendi.

Virkjun er opin alla virka daga frá 09.00 til 16.00. 

http://virkjun.blog.is/blog/virkjun/