Ár 2011, þriðjudaginn 5. júlí var haldinn 73. fundur í menningar- og bókasafnsnefnd Grindavíkur. Fundurinn var haldinn á bæjarskrifstofunni og hófst kl.09:30
Mætt: Valdís Kristinsdóttir formaður, Kristín Gísladóttir og Halldór Lárusson. Einnig sat fundinn Kristinn J. Reimarsson frístunda- og menningarfulltrúi sem ritaði fundargerð.
Formaður setti fund og bauð fundarmenn velkomna.
Dagskrá:
1012039 - Breytingar á Bókasafni Grindavíkur.
Á fundinn mættu Margrét Gísladóttir forstöðumaður Bókasafns Grindavíkur og Fanney Pétursdóttir forstöðumaður skólabókasafnsins.
Tekin fyrir skýrsla nefndar sem hafði það hlutverk að meta kosti og galla þess að sameina skóla- og almenningsbókasafn Grindavíkur. Nefndin þakkar fyrir mjög greinargóða skýrslu og tekur undir megin niðurstöðu skýrsluhöfunda þess efnis að ekki sé skynsamlegt að fara út í sameiningar á þessum söfnum nema útkoman verði betri en bæði söfn voru áður, sitt í hvoru lagi.
1107005 - Beiðni um áframhaldandi styrk við uppbyggingu leiklistar í Grindavík.
Nefndin telur það jákvætt fyrir bæjarfélagið að menningarstarf sé sem öflugast og þar með talin leiklistarstarfsemi. Sýningar GRAL hafa til þessa vakið verðskuldaða athygli og unnið til margvíslegra verðlauna sem virkað hafa jákvætt fyrir samfélagið í Grindavík. Nefndin beinir því til bæjarráðs að leitað verði allra leiða til að greiða götu GRAL og finna því húsnæði sem hentar fyrir starfsemina og jafnvel aðra menningarstarfsemi.
Fleira ekki rætt og fundi slitið kl. 10:30.
Kristín Gísladóttir
Valdís Kristinsdóttir
Halldór Lárusson