Í gærkvöldi hófu knattspyrnu- og körfuknattleiksdeildir UMFG við að breyta íþróttahúsinu í glæsilegan samkomusal fyrir 75 ára afmælishóf UMFG sem haldið verður með pompi og pragt í kvöld. Undirbúningur stóð fram á nótt, teppi er lagt á allt gólfið í íþróttahúsinu, svið er sett upp, dansgólfið parketlagt og svört tjöld sett upp á alla veggi. Stólar og borð er leigt úr Laugardalshöll. Þá verður salurinn skreyttur. Leikmenn, stjórnarmenn, makar, velunnarar og stuðningsmenn standa saman að því að undirbúa afmælishófið. Afmælishófið er um leið þorrablót og er uppselt í matinn, eða fyrir rúmlega 400 manns.

Þá hefur Bjarni Óla kokkur verið að undirbúa þorramatinn ásamt kröftugum konum undanfarna daga. Auk þorramats verður ýmislegt annað góðgæti á boðstólum.

Rétt er að taka fram að 20 ára aldurstakmark er á ballið. Verð á ballið sjálft er 2.900 kr. Hljómsveitin Í svörtum fötum leikur fyrir dansi.