Þriðjudaginn 5. júní s.l. valt fólksflutningabifreið á gatnamótum Grindavíkurvegar og vegar að Bláa lóninu. Ekki voru margir farþegar í bílnum en þó þurfti að kalla út tækjabíl til viðbótar við sjúkrabíl. Það vakti athygli formanns almannavarnarnefndar Grindavíkur, sem kom á staðinn, að ekki var kallaður út tækjabíll frá Grindavík heldur frá Brunavörnum Suðurnesja. Leitað hefur verið skýringar á þessum mistökum og lagði Ásmundur Jónsson slökkviliðsstjóri fram greinargerð um ferli í þessu tiltekna  útkalli. Mistökin liggja hjá Neyðarlínunni, ekki var kallað út í réttri röð. Í stað þess að kalla út sjúkrabíl og tækjabíl frá Grindavík er hringt fyrst í Brunavarnir Suðurnesja og síðan kallaður út sjúkrabíll úr Grindavík. Starfsmenn Neyðarlínunnar hafa viðurkennt þessi mistök. Almannavarnarnefnd beinir því til Neyðarlínunnar að yfirfara, af þessu tilefni, boðleiðir og útkallsferli m.t.t. þess  að mistök af þessu tagi endurtaki sig ekki.