Á Íslandi njótum við lítillar sólar á veturna og þá er mikilvægt að muna að bæta vítamíninu við fæðuinntöku. D-vítamín er eitt af mikilvægum lífefnum líkamans, hormón sem myndast í húðinni með hjálp frá geislum sólarinnar. Líkaminn geymir vítamínið í lifrinni en líka í fituvef og vöðvum.
Valdís Guðmundsdóttir, skólahjúkrunarfræðingur við Grunnskóla Grindavíkur segir mjög mikilvægt að muna eftir D vítamíninu í skammdeginu, ”það birtast reglulega fréttir og viðtöl sem sýna fram á að skortur á vítamíninu getur skapað heildufarslegan vanda. Lausnin er ósköp einföld, að taka bætiefni sem innihalda D-vítamín. Margir virðast ekki huga nægilega vel að D-vítamín búskap líkamans en mjög brýnt er að innbyrða nóg af þessu bráðnauðsynlega vítamíni”
Í morgun var sendur póstur á foreldra barna við Grunnskólann um mikilvægi D-vítamín inntöku en skilaboðin eiga ekki síður við um alla, unga sem aldna.
Valdís segir að líkami okkar fái fituleysanlega vítamínið D-vítamín á tvennan hátt, annars vegar breytir sólarljósið vissum efnum í D-vítamín í húðinni og við fáum einnig D-vítamín með fæðunni.
"Í fæðu fáum við D-vítamín einkum úr fiski, lýsi og eggjarauðum en þar að auki eru ýmsar matvörur bættar með D-vítamíni, meðal annars mjólkurafurðir."