Flest þekkjum við Grindvíkingar Fagradalsfjall. Fjallið hefur verið nokkuð í umræðunni, sérstaklega í tengslum við skjálftahrinuna sem gengið hefur yfir Reykjanesið í upphafi árs. Oftar en ekki áttu jarðskjálfrar upptök sín við Fagradalsfjall. Margir vita þó ekki hversu merkilegt fjallið er sögulega séð.
Grindvíkingar og aðrir gestir sem fara um Grindavíkurveg hafa líklega séð minnisvarðann austan við Grindavíkurveg. Þann 3. maí árið 2018 var minnisvarðinn afhjúpaður en það ár voru 75 ár liðin frá því að fjórtán manna áhöfn bandarísku sprengjuflugvélarinnar B24D Liberator fórst á Fagradalsfjalli. Eftir að endurbætur voru gerðar á Grindavíkurvegi er aðeins hægt að beygja inn á afleggjarann að minnisvarðanum þegar ekið er frá Grindavíkur.
Í tilefni þessa tímamóta afhjúpuðu ættingjar hinna látnu og bandaríska sendiráðið, ásamt áhugafólki um sögu og varðveislu stríðsminja, minnisvarðann. Hann hefur að geyma stóra eftirlíkingu af sprengjuflugvélinni úr ryðfríu stáli, að því er segir í tilkynningu. Eftir afhjúpun minnisvarðans var haldin minningarathöfn í Andrews Theater í Ásbrú.
Nýverið setti Ívar Gunnarsson inn skemmtilegt myndband á YouTube undir yfirskriftinni "Fjallið sem breytti mannkynssögunni" og má sjá hann labba á fjallið þar sem enn má sjá brak úr vélinni. Myndbandið má sjá neðst.
Fjórtán fórust í slysinu
Flugvélin var á leið heim til Bandaríkjanna í fyrirhugaða sigurför sem fyrsta sprengjuflugvélin sem hafði náð ósködduð að fljúga 25 árásarferðir frá Bretlandi yfir meginland Evrópu í seinni heimsstyrjöldinni.
Í flugslysinu fórust fjórtán manns, þar á meðal Frank M. Andrews, hershöfðingi og æðsti maður herafla Bandaríkjanna í Evrópu, sem var á leið til Washington til þess að leggja á ráðin um undirbúning innrásar bandamanna á meginland Evrópu. Einn maður lifði slysið af, George A. Eisel stélskytta, og var það í annað sinn sem hann komst lífs af úr slíku flugslysi.
Eisenhower tók við
Við fráfall Andrews tók Dwight D. Eisenhower hershöfðingi við sem æðsti maður herafla Bandaríkjanna í Evrópu og alls herafla bandamanna í Evrópu og stjórnaði innrásinni í Normandí árið eftir. Eisenhower var síðan forseti Bandaríkjanna á árunum 1953 – 1961.
Minnisvarðinn var reistur að frumkvæði Bandaríkjamannsins Jim Lux og ættingja þeirra sem fórust, með aðstoð Þorsteins og Ólafs Marteinssona. Allir eru þeir miklir áhugamenn um flugvélar og flugsögu seinni heimsstyrjaldarinnar.