4.Á er sigurvegari spurningakeppni miđstigs

  • Grunnskólafréttir
  • 25. maí 2020
4.Á er sigurvegari spurningakeppni miđstigs

Í dag fór fram úrslitaviðureignin í spurningakeppni miðstigsins. Þar mættust nemendur 4.Á og nemendur 6.GD. Bæði lið höfðu staðið sig frábærlega á leið sinni í úrslitin og var búist við spennandi viðureign. Að lokum voru það krakkarnir í 4.Á sem fóru með sigur af hólmi, lokatölur 50-19 og eru þau vel að sigrinum komin.

Það var mikil stemmning í salnum í dag enda allir bekkir miðstigsins mættir til að fylgjast með auk þess sem nemendur 3.bekkjar voru í heimsókn en hefð er fyrir því að þeim sé boðið að fylgjast með úrslitum spurningakeppninnar.

Keppnin fór vel af stað og eftir hraðaspurningar munaði þremur stigum. 4.Á gerði sér síðan lítið fyrir og náði í öll níu stigin í vísbendingaspurningum en 6.GD saxaði á forskotið í leiknum og fyrir flokkaspurningar var spennan mikil. Þar voru það hins vegar krakkarnir í 4.Á sem fóru á kostum og náðu sér í hvert stigið á fætur öðrum.

Þau stóðu að lokum uppi sem sigurvegarar en þetta er annað árið í röð sem nemendur úr 4.bekk vinna spurningakeppni miðstigsins.

Í sigurliðinu voru þau Hafþór Óli, Hreiðar Leó og Zofia en Júlía Bjarklind var leikari og Sara varamaður en hún tók sæti í liðinu í tveimur viðureignum.

Í liði 6.GD voru þau Andri Karl, Jón Steinar og Rakel og Gunnar Helgi sá um leikinn. Þórey Tea var varamaður og lagði sitt að mörkum í undirbúningi.

Allir nemendur eiga hrós skilið fyrir frammistöðuna en þau hafa lagt mikið á sig í undirbúningi fyrir keppnina, lesið bækur, skrifað punkta og æft sig. Allir nemendur fengu viðurkenningu fyrir þátttökuna og þá hlaut sigurliðið bókaverðlaun og pizzuveislu fyrir allan bekkinn á Papas.

Til hamingju 4.Á!




























Deildu ţessari frétt