Þótt hurðaleikurinn sé senn á enda er söguratleikurinn í fullum gangi. Veðurblíðan hefur verið einstök undanfarið og útlit fyrir blíðu áfram og því tilvalið að skella sér í leiðangur.
Skila þarf lausnum í Kvikuna eigi síðar en 21. júní næstkomandi því vinningshafar verða tilkynntir í Jónsmessugöngunni þann 22. júní.
Fróðleiksmolar – Númerin eiga við viðkomandi ratleiksmerki á kortinu.
1. Illahraun er talið hafa myndast í eldgosahrinu 1226 og er því með yngstu hraunum á Reykjanesskaganum.
2. Apalhraun kallast hin úfnari hraun. Yfirborðið er þakið gjallkenndu hraungrýti.
3. Helluhraun eru slétt og greiðfær yfirferðar. Þegar þau storkna myndast fremur þunn seig skán sem sígur áfram með rennslinu í bráðnu undirlaginu.
4. Skipsstígur er forn þjóðleið milli Grindavíkur og Innri-Njarðvíkur.
5. Rauðhóll, horft til austurs, er formfagur gígur, sem hraunið rann úr.
6. Víða má sjá litla hella, skúta og gjár í úfnu hrauninu og í þeim fallega burkna.
7. Reykjavegur sem er merktur með bláum/gulum stikum, liggur frá Reykjanestá að Hengilsvæði. Við Skst 42 þarf að beygja til vinstri í átt að Þorbirni.
8. Þorbjörn er 243 m hátt móbergsfjall sem hefur orðið til við gos undir jökli. Þorbjörn er einkennisfjall Grindavíkur. Uppruni nafnsins er óljós.
9. Í fjallinu er misgengi og myndast hefur lægð í því miðju sem nefnist Þjófagjá, sbr. Þjóðsöguna sem segir að í gjánni hafi haldið sig þjófar sem stálu fé af Grindvíkingum.