Nýr togari er að bætast í flota Þorbjarnar hf en beðið hefur verið með nokkurri eftirvæntingu eftir Tómasi Þorvaldssyni. Áætlað er að skipið muni hefja veiðar um miðjan júní. Sem stendur er togarinn í yfirhalningu en verið er að mála hann bláan í litum Þorbjarnar. Sjávarútvegsblaðið 200 mílur fjallaði um skipið í blaði sínu þann 1. júní sl.
Sisimiut verður Tómas Þorvaldsson GK sem eitt sinn var Arnar HU frá Skagaströnd.Togarinn var smíðaður árið 1992 fyrir Skagstrending hf. og bar þá nafnið Arnar HU en var seldur fjórum árum síðar til Royal Greenland sem hefur gert hann út síðan undir nafninu Sisimiut. Skipið er 67 metra langt og 14 metra breitt og vel tækjum búið að öllu leyti. Getur meðal annars dregið tvö troll, sem er fátítt á íslenskum skipum.
Um helgina voru bræðurnir Gunnar og Eiríkur Tómassynir sæmdir heiðursnafnbót Sjómanna- og vélstjórafélags Grindavíkur. Nýi togarinn ber nafn föður þeirra sem hét Tómas Þorvaldsson.
Nánar má sjá umfjöllun um nýja skipið ásamt viðtölum við þá Sigurð Jónsson og Bergþór Gunnlaugsson sem verða skipsstjórar á Tómasi. Þá er líka viðtal við Gunnar Tómasson en fjallað var um komu Tómasar í nýjasta sjávarútvegsblaði 200 mílna, sem fylgdi Morgunblaðinu 1. júní sl.
Mynd efst. Frá vinstri: Eiríkur Dagbjartsson útgerðarstjóri, Rut Óskarsdóttir og eiginmaður hennar, Gunnar Tómasson, framkvæmdastjóri hjá Þorbirninum, þá Gerður Sigríður, systir Gunnars og einn eigenda fyrirtækisins, Heiðar Hrafn Eiríksson skrifstofustjóri, Hrannar Jón Emilsson útgerðarstjóri og lengst til hægri er Friðrik Jón Arngrímsson, lögfræðingur og skipamiðlari.
Myndir: 200 mílur