Arkitektar frá Studio Granda hafa komið með fyrirspurn til bæjaryfirvalda í Grindavík vegna grágrýtis sem féll til við byggingu nýja hótelsins við Bláa Lónið. Um er að ræða blæbrigðaríkt grágrýti sem hugsað er sem hluti klæðningar á nýbyggingu Alþingis á horni Vonarstrætis og Tjarnargötu í Reykjavík. Sviðsstjóri skipulags- og umhverfissviðs, Sigurður Ólafsson og bæjarstjóri Fannar Jónasson eru að vinna málið áfram en bæjarráð tók vel í erindið í vikunni.
"Grágrýtið sem um ræðir var hugsað sem grjót í sjóvarnargarða hér í Grindavík sem Grindavíkurbær keypti þegar verið var að undirbúa nýju hótelbygginguna við Bláa Lónið. Núna erum við bara að skoða möguleikann á því hvernig við náum að koma til móts við beiðni Studio Granda og tryggja um leið að nægt grjót sé til staðar í varnargarðana." sagði Sigurður Ólafsson, sviðsstóri skipulagssviðs í samtali við heimasíðu Grindavíkurbæjar.