486. fundur Bæjarstjórnar Grindavíkur (aukafundur) haldinn í bæjarstjórnarsal, miðvikudaginn 1. ágúst 2018 og hófst hann kl. 17:00.
Fundinn sátu:
Sigurður Óli Þórleifsson forseti, Hjálmar Hallgrímsson varaforseti, Birgitta H. Ramsay Káradóttir aðalmaður, Guðmundur L. Pálsson aðalmaður, Hallfríður G. Hólmgrímsdóttir aðalmaður, Páll Valur Björnsson aðalmaður og Helga Dís Jakobsdóttir aðalmaður,
Fundargerð ritaði: Guðmundur L. Pálsson.
Forseti setur fundinn og óskar eftir að fundurinn verði lokaður.
Samþykkt með 6 atkvæðum. Páll Valur situr hjá.
Forseti óskar eftir að taka eftirfarandi mál á dagskrá með afbrigðum:
Þóknanir til kjörinna fulltrúa – 1807029.
Samþykkt samhljóða.
Dagskrá:
1. 1807029 – Þóknanir til kjörinna fulltrúa
Tillaga forseta: Að allir áheyrnarfulltrúar í bæjarráði fái greitt eins og aðrir bæjarráðsfulltrúar.
Til máls tóku einnig allir aðrir bæjarfulltrúar.
Samþykkt samhljóða.
2. 1806039 - Bæjarstjóri Grindavíkurbæjar: Ráðning
Tillaga forseta að kjósa á milli þeirra tveggja sem skoruðu hæst hjá Hagvangi, sem eru: Fannar Jónasson og Þorsteinn Gunnarsson.
Til máls tóku einnig allir aðrir bæjarfulltrúar.
Tillagan er samþykkt samhljóða.
Fannar Jónasson fjögur atkvæði þeirra Hjálmars, Guðmundar, Birgittu og Hallfríðar.
Þorsteinn Gunnarsson þrjú atkvæði þeirra Sigurðar, Helgu Dísar og Páls Vals.
Tillaga forseta: Að ganga til viðræðna við Fannar Jónasson í embætti bæjarstjóra Grindavíkur. Forseta bæjarstjórnar og formanni bæjarráðs falið að ræða við Fannar og leggja undir bæjarstjórn.
Samþykkt samhljóða.
Bókun S-lista:
Fulltrúi S-lista fagnar að niðurstaða sé fengið hvað varðar ráðningu bæjarstjóra fyrir Grindavíkurbæ.
Það er mjög mikilvægt nú þegar að niðurstaða liggur fyrir að kjörnir fulltrúar, bæjarstjóri og starfsmenn Grindavíkurbæjar gangi samhent til starfa á komandi misserum. Lykilatriði í því að nýta þau fjölmörgu tækifæri og áskoranir sem við stöndum frammi fyrir sem best eru góð samskipti, samvinna, virðing og traust. Traust er frumskilyrði mannlegra samskipta, það heldur samfélagi manna saman og um leið og það dvínar fer að halla undan fæti og samfélagið molnar. Það er einlæg ósk fulltrúa S-lista að sú bæjarstjórn sem kosin var til starfa næstu fjögur árin starfi saman að heilindum og setji sér í sameiningu markmið til framtíðar, markmið sem miði að því að gera okkar góða samfélag enn betra.
Fleira ekki gert og fundi slitið kl. 17:45.