Önnur umferð Útsvars hefst í kvöld og eru það lið Grindavíkur og Mosfellsbæjar sem ríða á vaðið. Þessi tímasetning kom nokkuð flatt upp á lið Grindavíkur þar sem ekki var reiknað með öðru en að keppni hæfist ekki að nýju fyrr en í janúar. Einn af keppendum liðsins, Lovísa Larsen, er einfaldlega ekki á landinu og því mun kunnulegt andlit birtast á skjám landsmanna í stað hennar í kvöld, en Andrea Ævarsdóttir mun hlaupa í skarðið fyrir Lovísu í kvöld. Andrea ætti að vera flestum hnútum kunnug í Útsvarinu en hún var í liði Grindavíkur síðastliðinn vetur.
Þátturinn hefst kl. 20:05 og verður í beinni útsendingu í sjónvarpi allra landsmanna.