Handverk og hönnun - námskeið fyrir handverks- og listiðnaðarfólk

• Menningarfréttir
• 3. mars 2017

Laugardaginn 11. mars verður Sunneva Hafsteinsdóttir, framkvæmdastjóri Handverks og hönnunar, með námskeið þar sem grindvísku handverks- og listiðnaðarfólki er boðið að koma og sækja sér fræðslu um markaðssetningu auk þess sem boðið er uppá ráðgjöf frá Sunnevu. 

Handverk og hönnun er sjálfseignarstofnun, meginmarkmið starfseminnar er að stuðla að eflingu handverks, listiðnaðar og hönnunar, og auka skilning almennt á menningarlegu, listrænu og hagnýtu gildi handverks, hönnunar og listiðnaðar með fjölbreyttri kynningarstarfsemi. 

Þeir sem vinna við handverk, listiðnað og fjölbreytta hönnun, eða eru að framleiða ýmsar sértækar íslenskar vörur/hluti eru hvattir til að koma og hlýða á ráð Sunnevu og ræða þær áskoranir sem bíða þeirra sem búa yfir góðri hugmynd, eru að koma henni í framkvæmd eða þurfta að finna góðar leiðir til að koma framleiðslu sinni til kaupenda. 
Námskeiðið er 11. mars og hefst klukkan 10:00 og verður í Kvennó.

• Síðast uppfært: 3. mars 2017