Sænskur markvörður til Grindavíkur

• Knattspyrna
• 21. febrúar 2017

Meistaraflokkur kvenna heldur áfram að bæta við sig erlendum landsliðskonum fyrir komandi sumar í Pepsi-deildinni en fótbolti.net greinir frá því í dag að hin sænska Martin Reuterwall sé gengin til liðs við Grindavík. Martin er 26 ára markvörður frá Svíþjóð og hefur leikið einn landsleik. Hin norður-írska Emma Higgins framlengdi sinn samning við Grindavík í desember og því ljóst að það verður hörð samkeppni um markmannsstöðuna í sumar.

Fótbolti.net greindi frá:

Grindavík fær sænskan markvörð (Staðfest)

Sænski markvörðurinn Malin Reuterwall hefur gengið til liðs við Grindavík fyrir átökin í Pepsi-deild kvenna í sumar.

Hin 26 ára gamla Malin hefur verið á mála hjá Umeå í sænsku úrvalsdeildinni undanfarin ár. Árið 2014 spilaði hún einn landsleik með liði Svía.

Emma Higgins, frá Norður-Írlandi, varði mark Grindavíkur í fyrra en hún verður einnig með liðinu í sumar. Hún og Malin munu berjast um markvarðarstöðuna í sumar.

Grindvíkingar hafa styrkt sig vel að undanförnu en liðið komst upp úr 1. deildinni í fyrrahaust. Á dögunum kom portúgalska landsliðskonan Carolina Ana Trindade Coruche Mendes til félagsins en hún er miðjumaður og framherji.

Þá bættust brasilísku leikmennirnir Thaisa de Moraes Rosa Moreno og Rilany Aguiar da Silva við hópinn í síðustu viku en þær spiluðu meðal annars úrslitaleik Meistaradeildarinnar með Tyresjö FF í Svíþjóð árið 2014.

• Síðast uppfært: 21. febrúar 2017