Síðustu 6 vikur hafa þrír starfsmenn frá grænlenska fiskvinnslufyrirtækinu Arctic Prime verið við starfsnám í Fisktækniskóla Íslands í Grindavík. Á Facebook-síðu skólans segir: „Í náminu er lögð áhersla á saltfisk, framleiðslutækni, hreinlæti, gæðastjórnun (HACCP), starfsmannastjórnun og markaðsmál - auk hagnýtrar þekkingar. Markmiðið var að mennta starfsmennina til verkstjórnar í fiskvinnslu í sinni heimabyggð m.a. í Nanortalik.“
Mbl.is fjallaði um útskriftina:
„Þrír fisktækninemendur frá Grænlandi útskrifuðust í gær frá Fisktækniskóla Íslands í Grindavík.
Þorgerður Katrín Gunnarsdóttir sjávarútvegsráðherra afhenti nemendunum prófskírteinin en þeir luku námi sem sniðið er að starfsfólki vinnslustöðva. Athöfnin fór fram í atvinnuvega- og nýsköpunarráðuneytinu að viðstöddu fjölmenni.
Nemendurnir, þeir Lasse Abelsen, Angutivik Aimonsen og Marius Simonsen, eru allir frá bænum Nanortalik á Suður-Grænlandi. Þar búa um 1.300 manns og langstærsta atvinnugreinin er vinnsla á saltfiski. Aukin áhersla hefur verið á að bæta gæði framleiðslunnar og auka fullvinnslu en til þessa hefur fiskurinn verið seldur úr bænum lítið unninn, að því er fram kemur í umfjöllun um útskrift þessa í Morgunblaðinu í dag.“