59. fundur Fræðslunefndar haldinn í bæjarstjórnarsal, mánudaginn 5. desember 2016 og hófst hann kl. 17:00.
Fundinn sátu:
Þórunn Svava Róbertsdóttir formaður, Ómar Örn Sævarsson aðalmaður, Guðmundur Grétar Karlsson aðalmaður, Fríða Egilsdóttir leikskólastjóri, Halldóra Kristín Magnúsdóttir grunnskólastjóri, Sigurpáll Jóhannsson 2. varamaður, Magnús Andri Hjaltason 1. Varamaður, Bylgja Héðinsdóttir aðstoðarleikskólastjóri og Ellert Sigurður Magnússon áheyrnarfulltrúi.
Fundargerð ritaði: Ingibjörg María Guðmundsdóttir, yfirsálfræðingur.
Dagskrá:
1. 1612004 - Aukið samráð um skóladagatal í leik- og grunnskóla
Lögð fram tillaga fræðslunefndar um að haft verði formlegt samráð við foreldrafélög leik- og grunnskóla í vinnuferli við gerð skóladagatala ásamt þeim umsögnum sem bárust um tillöguna. Samkvæmt umsögnum eru aðilar sammála auknu samráði og settu fram mismunandi leiðir í því.
Fræðslunefnd felur skólaskrifstofu og skólastjórnendum að vinna skóladagatöl skólanna þannig að haft verði formlegt samstarf við fulltrúa foreldra strax við upphaf vinnslu á skóladagatölum skólanna.
2. 1601010 - Biðlistar í leikskólum og nemendafjöldi í skólum.
Lögð fram fjáhagsáætlun skólanna þar sem fram kemur að ekki er gert ráð fyrir fjármagni árið 2017 til að hefja undirbúning að stækkun Hópsskóla og/eða Króks. Gert er ráð fyrir lausum kennslustofum við Hópsskóla árið 2019. Skólastjórnendur grunn- og leikskóla leggja fram bókun þar sem þeir lýsa vonbrigðum sínum með niðurstöðu fjárhagsáætlunar næstu árin. Svo virðist sem framtíðarsýn starfshópsins hafi verið höfð að vettugi.
3. 1610007 - Skólastarf: ytra mat sveitarfélags á skólahaldi 2016-2017
Lögð fram skýrsla um úttekt á Grunnskólanum skv. áætlun fræðslunefndar. Matsþættir haustsins eru þrír sem tilheyra Stjórnun, þ.e. starfsáætlun og skólanámskrá, skóladagur nemenda og verklagsreglur og áætlanir. Fræðslunefnd lýsir ánægju sinni með stöðu skólans og óskar starfsmönnum skólans til hamingju með að vera komin eins langt á veg og raun ber vitni.
4. 1612005 - Grunnskóli: Stigskipting innan Grunnskóla og samstarf við félagsmiðstöð og bókasafn
Lagt fram bréf frá sviðsstjóra frístunda- og menningarsviðs þar sem lýst er áhuga á viðræðum um stigskiptingu innan grunnskólans. Ástæðan er áhrif stigskiptingar á starfsemi Þrumunnar og bókasafns. Halldóra skólastjóri gerði grein fyrir stöðu málsins.
Fleira ekki gert. Fundi slitið kl. 17:55