Þann 23. desember síðastliðinn, hálftíma fyrir jólafrí eða svo, kom fríður flokkur Japana í heimsókn á bæjarskrifstofur Grindavíkurbæjar. Í hópnum voru embættismenn og forstjórar frá borginni Ibusuki en hún er þekkt fyrir svarta sanda og heit jarðböð. Tilgangur heimsóknarinnar var einmitt að fræðast um nýtingu jarðvarma á hagkvæman og umhverfisvænan hátt sem og um uppbyggingu ferðamannastaða samhliða en það starf og sú uppbyggingin sem hefur verið unnin á þessu sviði hér í Grindavík og í Auðlindagarði HS orku hefur vakið athygli á heimsvísu.
Róbert Ragnarsson bæjarstjóri tók á móti hópnum og fór yfir og svaraði fjölmörgum spurningum og að lokum skiptust hann og Hiroshi Sato, aðstoðarbæjarstjóri Ibusuki, á gjöfum.
Hópurinn var með margar undirbúnar fyrirspurnir sem Róbert svaraði með glöðu bragði.
Hiroshi Sato kom færandi hendi og Róbert afhenti honum einnig nokkrar gjafir frá Grindavík.