Guðni og Guðlaugur Gústafssynir voru heiðraðir sem stuðningsmenn ársins við kjör íþróttamanns og íþróttakonu ársins á gamlársdag. Þetta er í fyrsta skipti sem þessi verðlaun eru afhent en þau verða árlegur viðburður hér eftir.
Óskað var eftir tilnefningum frá bæjarbúum um stuðningsmann ársins og það var svo stjórn UMFG sem sá um valið.
Bræðurnir hafa átt ársmiða á leiki UMFG í körfubolta svo lengi sem elstu menn muna og mæta á alla leiki í meistaraflokki karla og meistaraflokki kvenna og sitja þar á sama stað. Þeir mæta alltaf - en ekki bara í úrslitakeppninni og styðja bæði konur og karla. Einnig mæta þeir á mörg fjölliðamót yngri flokka og úrslitaleiki þar. Þessi ómetanlegi stuðningur frá hinum venjulega íbúa er eftirtektarverður og þakkarverður.