Vikuna 7.-11. júlí ákváðum við í Vinnuskólanum að fara í eitt lítið ruslaverkefni og sá undirritaður um það verkefni. Verkefnið fólst í því að labba upp Víkurbrautina á hverjum degi frá Garðsvegi að Nesvegi og áttum við að tína rusl á Víkurbrautinni.
Við ákváðum að skipta Víkurbrautinni í þrjú svæði, fyrsta svæðið var frá Garðsvegi að Hvassahrauni, annað svæðið var frá Hvassahrauni að hringtorginu á Gerðavöllum og að lokum var þriðja svæðið frá Gerðavöllum að Nesvegi. Eftir hvern dag sem við tíndum ruslið þá töldum við ruslið og skráðum það niður. Markmið þessa verkefnis var að vekja bæjarbúa okkar annars fallega bæjar til umhugsunar og ýta undir betri umgengni í bænum.
Eins og gefur kannski að skilja þá var mesta ruslið á mánudeginum, fyrsti dagur vikunnar eftir helgi og svo var líka mesta ruslið á svæði 2 og má það rekja til sjoppanna tveggja, Aðal-Brautar og Skeifunnar. Það sem mér persónulega fannst verst í þessari annars léttu könnun var það að á hverjum einasta degi voru komnar yfir tuttugu tegundir af mismunandi rusli á þessari lengstu og umferðarþyngstu götu bæjarins. Hvað segir það okkur?
Jú það segir okkur að við bæjarbúar erum að henda rusli á götur bæjarins á hverjum degi, líklega úr bílum okkar, eða þá á kvöldgöngu okkar um bæinn. Hvernig má laga þetta? Auðveld lausn er að Grindavíkurbær fjölgi ruslatunnum á þessum svæðum en getum við bæjarbúar ekki einnig litið í okkar eigin barm og sett kannski einn lítinn poka í bílinn fyrir rusl til dæmis?
Samantekt yfir helsta rusl á svæðunum þremur
Svæði 1:
4 flöskur
1 pulsubréf
1 sígarettupakki
1 Coke dós
Svæði 2:
1 kassi frá ísbílnum
6 ísskeiðar
14 rör
5 ísbox
7 tappar
3 svalafernur
37 sígarettustubbar
Svæði 3:
2 flöskur
1 vettlingur
1 sokkur
2 ruslapokar
2 svalafernur
Bjarni Þórarinn Hallfreðsson, fréttaritari Vinnuskólans