Tauþrykk og tvívíð form

• Grunnskólafréttir
• 1. júní 2020

Læsi er grunnur að öllu námi.  Undanfarna vetur hefur kennsluaðferðin Byrjendalæsi verið kennd á yngsta stigi.  Í stuttu máli byggir Byrjendalæsi á aðferðum sem rannsóknir hafa leitt í ljós að skila árangri í læsisnámi barna. Rík áhersla er lögð á að nálgast efnið á fjölbreyttan máta og efla orðaforða.   Lestur-hlustun-talað mál og ritun er  meginstefið ásamt samvinnu  og unnið er með allra handa efnivið.  Byrjendalæsi gerir ráð fyrir því að hægt sé að kenna börnum sem hafa ólíka færni í lestri hlið við hlið og því er lögð áhersla á samvinnu um leið og einstaklingsþörfum er mætt. (heimild:https://www.msha.is/is/byrjendalaesi)   Kennarar á yngsta stigi hafa sótt námskeið, hlustað á fyrirlestra og fundað saman.  María Eir Magnúsdóttir kennari í 2.bekk er leiðtogi í þeirri vinnu.  Margvíslegar bækur, skáldskapur, fræðibækur og einnig kvikmyndir hafa verið viðfangsefni og kennslan því mjög fjölbreytt.  Á veirutímum lásu nemendur annars bekkjar lestrarbókina Stuð á stærðfræðisýningu og í framhaldinu fengu þeir að þrykkja með taulitum á viskustykki.  Þetta var skemmtileg vinna og nemendur voru stoltir með formin sín sem höfðu margvíslega lögun.  Á göngum skólans mátti svo sjá afraksturinn.

Stærðfræði er út um allt.  Tvívíð og þrívíð form.

Eftirvænting, beðið eftir taumálningu og formum.

Þetta verk gæti heitið Bleikir hringir!

Vinnugleði og einbeiting.

Verður ekki amalegt að hafa svona viskustykki í eldhúsinu.

Þetta er skemmtilegt!

• Síðast uppfært: 1. júní 2020