Saumað fyrir Ástralíu

• Grunnskólafréttir
• 24. janúar 2020

Halla Sveinsdóttir textílkennari hefur undanfarna daga og vikur verið með frábært verkefni í gangi í 4.-8.bekk þar sem nemendur hafa saumað poka úr íslensku ullarefni fyrir dýr, slökkvilið og björgunarfólk sem staðið hafa í ströngu vegna skógareldanna í Ástralíu.

Nemendur sýndu verkefninu mikinn áhuga. Fyrst sagði Halla þeim frá því sem gerst hafði í Ástralíu en hún hefur verið í sambandi við aðila hér á Íslandi sem stóðu fyrir söfnun og biðluðu til fólks að búa til poka sem hægt væri að senda út. Pokarnir eru til dæmis notaðir fyrir kengúruunga sem misst hafa móður vegna eldanna.

Krakkarnir bjuggu til 60 poka og fjallað hefur verið um þeirra framlag á Facebook síðunni "Skógareldarnir í Ástralíu - prjónað fyrir dýrin". 

Auk pokanna sendu krakkarnir auk þess stutt skilaboð með pokunum og teiknuðu myndir.

Sannarlega frábært verkefni þar sem nemendur sýna samkennd með öðrum og felst mikið nám í þessu framtaki.

• Síðast uppfært: 24. janúar 2020