Krakkarnir í 3. bekk í núvitundarhóp fóru í síðustu viku í smiðjutímanum í gönguferð í Gaujahellir. Þar skoðuðu þau hellinn og fengu sér kakó í rólegheitunum. Gaujahellir er staðsettur rétt fyrir utan bæjarmörk Grindavíkur í hrauninu meðfram Grindavíkurveginum. Að vísu er stutt þangað til hellirinn verður kominn inn fyrir bæjarmörkin því nýjustu göturnar í Hópshverfinu eru farnar að teygja sig alveg að honum.
Núvitund (mindfulness) felst í því að veita lífi okkar og líðan á hverri stundu vakandi athygli með opnum huga, forvitni og án fordóma. Þjálfa athyglina og stækka meðvitund um það sem er að gerast innra með okkur, í lífi okkar og í umhverfinu á meðan það er að gerast. Og hvað er þá betra en að fara út í hraun, upplifa og skoða náttúruna og gera núvitundaræfingar. Krakkarnir eru mjög kátir með þessa tíma og hún Halldóra kennari er ótrúlega flink að finna upp á skemmtilegum tímum.